Башҡортостан мәктәптәренә 17 яңы автобус тапшырылды

– 1 сентябрь алдынан мәктәптәргә яңы автобустар тапшырыуға шатбыҙ. Республиканың 52 меңдән ашыу балаһының уҡыу көнө мәктәп автобусынан башлана – был ҙур һан. Иң мөһиме – юлдарҙа хәүефһеҙлек булһын. Ә хәүефһеҙлек – ул яңы, яҡшы автобустар һәм профессиональ водителдәр. Шуға күрә бөгөн мин яңы техника асҡыстарын ҙур теләк менән тапшырам. Имен юлдар теләйем, сөнки мәктәп водителенең эше бик яуаплы, – тип һыҙыҡ өҫтөнә алды Радий Хәбиров. – Хөрмәтле мәктәп директорҙарын яҡынлашып килгән Белем көнө менән ҡотлайым! Һеҙгә һәм коллективтарығыҙға һаулыҡ, уңыштар, именлек теләйем. Уҡыусыларығыҙҙы һағынғанһығыҙҙыр, моғайын. Яңы уҡыу йылына аяҡ баҫабыҙ.

Төбәк етәксеһе «Вектор NEXT» маркалы яңы быуын автобустарының береһе менән танышты Машиналар навигация системаһы, тахографтар менән йыһазландырылған, заманса хәүефһеҙлек талаптарына яуап бирә. Бынан тыш, биш автобус салонына өҫтәмә рәүештә көсәйтелгән йылытҡыстар ҡуйылған. Был транспорт саралары 15 муниципалитет мәктәптәренә оҙатыла.

2019 – 2024 йылдарҙа мәктәп автопарктары 700 яңы автобус менән тулыланған. Шуларҙың 253-ө – төбәк бюджеты иҫәбенә, ә 447-һе федераль саралар ярҙамында һатып алынған.

Белешмә:

Яңы автобустарҙы Асҡын, Ауырғазы, Балтас, Дәүләкән, Дыуан, Йәрмәкәй, Мәсетле, Миәкә, Тәтешле, Өфө, Әбйәлил, Яңауыл райондары һәм Күмертау, Сибай, Өфө ҡалалары мәктәптәренә тапшырҙылар.

Башҡортостанда уҡыусыларҙы белем биреү учреждниеларына алып барыуға барлығы 1 мең 523 автобус йәлеп ителгән. Улар 2 638 тораҡ пункттан 52 206 баланы йөрөтә.

glavarb.ru сайтынан алынды.