Яңы форма оҡшаны!

 Быйыл форманы һайлауға айырыуса яуаплы ҡарайбыҙ. Беҙҙең мәктәп Өфөләге «Йәйғор» ательеһын һайланы. Ҡыҙҙар өсөн – күлдәк менән алъяпҡыс, малайҙар өсөн – салбар менән пинжәк. Төҫтәре лә бер иш. Бөтәһе лә бик матур! Иң мөһиме – беҙҙең өсөн!

Минеңсә, өлкәндәр беҙҙең хаҡта ҡайғырта. Тәрбиәүи эштәр буйынса директор урынбаҫары Асия Йосопова әйтеүенсә, мәктәп формаһын һайлау – уртаҡ эш. Ата-әсәләрҙең һәм уҡыусыларҙың фекерен иҫәпкә алырға кәрәк. Иң мөһиме – форма тәбиғи материалдарҙан тегелгән, уңайлы булһын.
Йыл уҡыусыһы Яҙгөл Хәжиәхмәтова (һүрәттә): «Яңы форма миңә көс бирәсәк. Ышаныслы итеп тоям үҙемде!» – тине.
– Балаға формала йөрөүе ҡыйын булмаҫҡа тейеш. Улар бит көнө буйы уҡый, – ти әсәһе Юлиә апай ҙа ике ҡыҙына форма һайлағанда. Сәләмәтлек мөһим. Бик дөрөҫ!
Был күлдәк менән алъяпҡыс миңә лә бик оҡшаны. Уны тиҙерәк кейеп мәктәпкә барғым килә. Мин әҙер! Ә һин?

Зөлхизә ЙОСОПОВА.
Белорет районы,
Инйәрҙәге 2-се мәктәп.