Беҙҙең мәктәптең Х синыф уҡыусыһы Маһинур Һибәтоваға «Орлёнок» лагерында ял итеү бәхете тейҙе.
Башҡортостандан 24 уҡыусы барған. Улар бөтәһе лә тик «бишле» билдәләренә генә уҡый, шулай уҡ төрлө олимпиада еңеүселәре. Лагерҙа 20 көн булғандар.
Шулай ҙа иң ҡыҙығы делегациялар менән таныштырыу көнө булды. Беҙ, башҡорттар, үҙебеҙҙең республика тураһында сығыш әҙерләнек. Башҡортостан нимә менән дан тота – бөтәһен дә ҡыҫҡа ваҡыт эсендә күрһәтергә, һөйләргә тырыштыҡ. Миңә, өләсәйем эшләгән түшелдеректе лә алып барғанлыҡтан, башҡорт бейеүен бейергә ҡуштылар.
Краснодар ҡалаһында сәйәхәттә булдыҡ. Ҡара диңгеҙҙе күреү ҙә күптәнге хыялым ине. Көндәр һыуыҡ булыу сәбәпле, һыу инә алманыҡ. Ләкин ярҙан тороп диңгеҙҙе күҙәтеү ҙә мауыҡтырғыс ине.
Мәктәбемдең уҡытыусылар коллективына ҙур рәхмәтемде белдерәм. Айырыуса Зифа Алламорат ҡыҙына, Зариф Вәкил улына, Айбулат Сәрүәр улына. Ышаныстары һәм миңә тағы ла бер ай йәй бүләк иткәндәре өсөн. Уларҙың йөҙҙәренә ҡыҙыллыҡ килтермәм, артабан да тырышып уҡырмын, – тип шатлыҡтары менән уртаҡлашты ҡыҙ.
Маһинурға киләсәктә лә тик уңыштар юлдаш булһын.
Заһиҙә РӘЖӘПОВА, йәш хәбәрсе.
Әбйәлил районы, Ҡаҙмаш мәктәбе.