Софья башҡортса өйрәнә

Мин һеҙҙе үҙемдең бер шәп уҡыусым менән таныштырырға теләйем. Софья Гулина була ул. Беҙҙең гимназияның VIII «Б» синыфында белем ала. Софья 5 йәшендә – уҡырға, ә 6 йәшендә яҙырға өйрәнгән. Мәктәпкә иртә барыуына ҡарамаҫтан, синыфташтарынан бер ҙә ҡалышмай. Беренсенән үк башҡорт телен ҡыҙыҡһынып, мауығып өйрәнә башлай. Күп уҡый, күпте белергә тырыша. Йыл һайын олимпиадаларҙа, конкурс­тарҙа, төрлө ярыштарҙа, викториналарҙа ҡатнаша. Ике йыл рәттән башҡорт теленән район буйынса еңеп сыҡты, ә ҡала олимпиадаһында призлы урын алды. «О тебе, моя малая Родина» ҡала-интер­нет викторинаһында призёр булды. Мәктәптә йыл да үтә торған «Йондоҙҙар парады»нда башҡорт теленән «Йыл лингвисы» номинацияһында еңеү яуланы. Башҡорт мәҙәниәтенә, теленә, тарихы­на Софьяның ҡыҙыҡһыныуы йылдан-йыл арта ғына.

Буш ваҡытында бейеүҙәр менән шөғөлләнә, бигерәк тә башҡорт халҡыныҡы оҡшай. Төрлө конкурстарҙа ҡатнаша. Уҙған йылдың йәйендә Мәскәүҙә үткән бәйгелә башҡорт бейеүе менән еңеүсе булғас, шунда биргән интервьюһында: «Үҙемдең сығышым менән Башҡортостаным – тыуған яғымды, халҡын күрһәтергә теләнем. Бындай конкурста беренсе тапҡыр ҡатнашам һәм ул бик оҡшаны. Бөтә ҡатнашыусылар ҙа көслө булыуҙарына ҡарамаҫтан, тырышлығым финалға еткерҙе», – тигәйне. Бында «Хореография. Халыҡ бейеүе» номинацияһында 7 – 12 йәшлектәр араһында I урын яулай. Ана шундай ҡыҙ ул беҙҙең Софья! Уҡыусыма һаулыҡ, уҡыуында уңыштар, бәхет теләйем!