Музейға барҙыҡ

Ҡыштың һуңғы көнөндә Иҫәнғол ауылындағы балалар һәм үҫмерҙәр ижадын үҫтереү үҙәгенең «Ҡағыҙҙан моделдәр» түңәрәгенә йөрөүсе уҡыусылар Тарихты һәм тыуған яҡты өйрәнеү музейына экскурсияға барҙы. Уның директоры Гөлшат Миңлеғәле ҡыҙы Дүшәнбаева менән ойоштороусы Алёна Азгар ҡыҙы Псәнчина беҙҙе йылы ҡаршыланы.

Музей 1989 йылдың 25 ию­ненән алып эшләй. Темалары буйынса биш бүлмә йыһазландырылған. Тәүгеһе Ейәнсура районы тәбиғәтенә ба­ғышланған: ҡоштарҙың, хай­уандарҙың, балыҡтарҙың һындары урын алған, хатта мамонт теше лә бар. Уларҙы яҡташыбыҙ Ҡасим Янбаев тапшырған. Икенсе бүлмәлә Ейәнсура районынан сыҡҡан билдәле шәхестәрҙең фотолары, китаптары, эштәре ҡуйылған. Өсөнсөһө «Хәрби дан» бүлмәһе тип атала. Исеменән үк күренеүенсә, бында һуғыш ҡоралдары, һалдат хаттары, кейемдәре, фотолары һәм баш­ҡа бик күп хәтирәләр һаҡлана.
«Һауыт-һаба һәм көнкүреш» тигән залда уҡыусылар үҙ ҡулдары менән балаҫ һуғып, ҡул тирмәненән он үткәреп, йүкәнән сабата үреп ҡараны. Ә бер бүлмәлә ерле халыҡтарҙың музыка ҡоралдары, сәхнә кейемдәре, төрлө сувенирҙар ҡуйылған.
Уҡыусылар музейҙан бик күп мәғлүмәттәр алып, илһамланып сыҡты.

Ейәнсура районы.