«Илһам»дан илһам алып…

Мифтахетдин Аҡмулла исемендәге БДПУ-ның баш­ҡорт филологияһы факультеты йыл һайын баш­ҡорт телендә «Илһам» конкурсы үткәрә. Һәләтле балалар үҙәге менән берлектә уҙғарыла ул. Бәйге VIII – XI синыф уҡыусылары өсөн ойошторола. Башта дистанцион рәүештә ике этапты үтергә кәрәк. Ә ин­де еңеүселәрҙе Өфөгә са­ҡыралар.

Һынауҙарҙы уңышлы үтеп, мин дә баш ҡалаға өс көнгә саҡырыу алдым. Конкурс ике йүнәлештә ине: тележурналистика һәм ижади эштәр төрө. Рес­публика кимәлендә уҙғарылғас, төрлө райондарҙан һәләтле, аҡыллы балалар йыйылған. Беҙ бер-беребеҙ менән тиҙ арала танышып, дуҫлашып та өлгөрҙөк. Тәүге көндө уни­верситеттың етәкселәре менән аралаштыҡ, уҡыу йорто буйлап экскурсияла йөрөнөк. Шулай уҡ «Тул­ҡын» берләшмәһендә булдыҡ, «Илһам» конкурсының беренсе ҡатнашыусылары менән күрештек. Улар үҙҙәренең шиғырҙарын уҡып ишеттерҙе. Ә ин­де икенсе көндө яҙыусы Таң­сулпан Ғарипова һәм журналист Мөнир Ҡунафин менән осрашыу булды. Таңсулпан апай беҙгә маҡсат ҡуйып йәшәргә кәрәклеген аңлатты, Мөнир ағай повесть яҙыу сер­ҙәрен систе. Баш­ҡорт­ос­тан юлдаш телевидение­һына ла барып, яңылыҡтар программаһын нисек сы­ғар­ғандарын, дикторҙар эшен кү­ҙәттек.
Шул уҡ көндө Мәжит Ғафури исемендәге Башҡорт дәүләт академия драма тетрында «Әбейүшкә@эт тущка.ru» исемле спектаклен ҡараныҡ. Комедия барыбыҙға ла оҡшаны.
Һуңғы көндө шағирә Лариса Абдуллина менән осраштыҡ. Йәнле әңгәмәбеҙ Салауат Юлаев, туған теле­беҙ, милләтебеҙ, баш­ҡорт мәҙәниәте хаҡында барҙы. Уның менән Өфөнөң матур урындарында булдыҡ.
Был конкурста еңеүселәрҙе, призёрҙарҙы университеттың башҡорт филологияһы деканы, профессор Луиза Хәмзә ҡы­ҙы Сәмситова ҡотланы һәм уҡырға килергә саҡыр­ҙы.
Шулай итеп, өс көнөбөҙ тиҙ арала үтеп тә китте. Үҙе­мә әллә күпме фәһемле мәғлүмәттәр алдым, яңы дуҫтар таптым. Конкурсҡа мине әйҙәүсе, башҡорт теленә һөйөү тәрбиәләгән уҡытыусым Гөлсөм Урал ҡыҙы Йылҡыбаеваға сик­һеҙ рәхмәтлемен. «Илһам»­дан илһам алып ҡайттым. Уҡыу­сыларға ҡанат ҡуйыу­сы ижади бәйге күңелдәр­ҙә оҙаҡ һаҡланыр.

Белорет районы, Шығай мәктәбе.