Тыуған көн бүләге

Һеҙҙең ял йортонда булғанығыҙ бармы? Ә минең бар! Эй, шәп икән унда! Егерме көн Шишмә районы Әлкә ауылындағы «Толпар» балалар шифаханаһында рәхәтләндем генә. Ә юлламаны ун йәшемә атайым менән әсәйем һәм балалар табибы булып эшләүсе Фирүзә апайым бүләк итте.

Баштараҡ өйҙәгеләрҙе, яҡындарымды, бигерәк тә си­ныфташтарымды ныҡ һа­ғындым, аҙаҡ яйлап өйрәндем. Шифаханала һәр көнөбөҙ, сәғәтебеҙ планлаштырылған ине. Иртәнсәк тор­ғас та физзарядка эшләйбеҙ, тәмле бутҡа ашап алғас, мәктәпкә уҡырға барабыҙ. Бында дәрестәрҙе мауыҡтырғыс итеп үткәрәләр. Үҙенсәлекле яғы ла бар. Икенсе дәрестән һуң – кислородлы коктейль, өсөнсөһөнән һуң – икенсе иртәлек, төрлө емеш-еләк, дүртенсе дәрестән һуң ҡымыҙ бирәләр. Уҡыуҙар бөткәс, төрлө һауыҡтырыу курс­тары үтәбеҙ. Массаж, лазерлы терапия, тоҙ шахтаһы – быларҙың барыһы ла тәжрибәле табиптар күҙәтеүе аҫтында башҡарыла. Ашнаҡсылар бешергән тәмле төшкө аштан һуң ял итеп алабыҙ. Сенсорлы бүлмәлә шариклы һыуҙа булабыҙ, төрлө көйҙәр тыңлайбыҙ. Аҙаҡ инде йән­һүрәттәр ҡарайбыҙ, тыш­ҡа сығып уйындар уйнайбыҙ: футбол, баскетбол, пионербол, волейбол, өйрәк атыш һәм башҡалар.

Кискеһен күңелле дискотекалар ойошторолдо. Шәмбе көндәре мунсаға йөрөнөк. Бына ошондай тәртип буйынса егерме көн үткәне һиҙелмәй ҙә ҡалды. Мин шифаханала бик күп яңы дуҫтар таптым. Бер-беребеҙгә ныҡ өйрәнеп киттек. Өфөнән Әмир, Мансур, Артур, Альберт, Рома, Архангел районынан Илнар, Учалынан Имель, Санкт-Петербургтан Герман менән яҡын дуҫтар булып айырылыштыҡ. Артабан да аралашып торорға һүҙ ҡуйыштыҡ.
Беҙҙе шифаханала үҙ эшен белгән, балаларҙы яратҡан тәрбиәселәр ҡараны, белемле уҡытыусылар уҡытты.
Миңә матур ял итергә, яңы дуҫтар табырға ярҙам иткән «Толпар»ға рәхмәтлемен. Егерме көн эсендә атай-әсәйемде, туғандарымды, синыфташтарымды, синыф етәксебеҙ Эльмира Морат ҡыҙын һағынып ҡайттым.
Бына шулай көҙгө каникулды яҡшы кәйеф менән ҡаршылайым.