Китап биттәрендә – бесәйҙәр

Бәләкәй саҡтан уҡ балаларҙа тәбиғәткә, ҡоштарға, ҡырағай һәм йорт хайуандарына ҡарата һаҡсыл ҡараш, иғтибарлылыҡ тәрбиәләргә кәрәк. Шул айҡанлы беҙҙең балалар китапханаһында «Китап биттәрендә бесәйҙәр йөрөй» тигән экологик терапия сәғәте үтте. Был сарала һүҙ мыяубикәләр, ҡуяндар һәм диңгеҙ ҡомаҡтары тураһында барҙы. Төрлө йәштәге беҙҙең китап уҡыусыларыбыҙ был көндө китапханаға үҙҙәренең бесәй­ҙәрен дә алып килде.

Кескәйҙәр «Минең йомшаҡ, йөнтәҫ дуҫым» тигән күргәҙмә менән дә танышты, унда йорт хайуандары тураһында бик күп кәрәкле мәғлүмәттәр бирелгәйне. Уларҙың ҡылыҡтары, холоҡтары тураһында әңгәмәләшеү булды. Нисек хайуандарҙы ҡарарға, ашатырға һәм дауаларға кәңәштәр бирелде.
«Ғәжәйеп бесәйҙәр донъяһы» исемле биш минутлыҡ видеофильм да ҡаранылар. Уны китап уҡыусылар үҙҙәре төшөргән икән. Балалар фильмдан бесәйҙәр­ҙең ҡайҙарҙа йәшәүҙәре, йортҡа эйәләшеүҙәре һәм уларҙың төрҙәре тураһында бик күпте белде.
Китапханасылар нисек итеп йорт хайуандарын дөрөҫ тәрбиәләргә, яратырға һәм улар алдында яуап­лы булырға өйрәтеп, экологик терапия сәғәтен тамамлап ҡуйҙы. Йәш китап уҡыусылар «Итекле бесәй» тигән кәнфиттәр менән һыйланып, иҫтәлеккә бесәй балалары төшөрөлгән бәләкәс календарҙар менән бүләкләнеп ҡыуанды.

Өфө ҡалаһы.