Мостай Кәрим илендә

Өй алдында яңғыҙ ҡарт тирәгем

Һуңғы япраҡтарын ҡаҡһа ла,

Тормошта яҙ –

Сирень ағастары

Сәскә ата кеүек баҡсала…

Мостай Кәримдең «Көҙ» шиғырының ошо юлдарындағы һуңғы япраҡ та, көҙ моңһоулығы ла дәрес темаһына ятышлы ине. VIII синыф уҡыусылары дөрөҫ әйтте бит: «Тормошта яҙ, моңаймайыҡ көҙгә, әйҙә сирень сәскәләре сәскә атһын баҡсабыҙҙа». Шулай итеп, беҙ көҙҙөң һуңғы көндәрендә «Мостай Кәрим илендә» булып, синыфтан тыш дәрес үткәр­ҙек. Бишенселәр унда Оксана, Йәмил кисерештәре менән йәшәне. Презентациялағы тәүге иллюстрацияны әҫәр­ҙең аҙағы менән башлап, уҡыу­сыларҙа китапты тиҙерәк уҡып сығыу теләге уятыу ине. Һүрәттә – ат сана­һында ғәмһеҙ Оксана менән Йәмил, борсоулы атайҙар, әсәй һәм өләсәй. Унда яҙылған диалогты ла уҡығас, уҡыусылар айырылыуҙың нимә икәнен аңланы. VIII, IX синыфтар «Мостай Кәримсә, нимә ул мөхәббәт?» тигән һорауға яуап эҙләне.
Мостай Кәримдең мөхәббәт темаһына арналған шиғырҙарын тасуири уҡып, дәресте йәмләнек. Һуғыш­ҡа ҡағылғандарында яҙыусының ҡан эҙҙәре буял­ған комсомол билеты балалар­ҙа күп һорауҙар тыу­ҙырҙы. Ошоға бәйләп, ғаилә фотоларын ҡарап, шағир­ҙың тормош юлындағы иҫтәлекле мәлдәргә туҡталдыҡ. Дәресте Мостай Кәрим һүҙҙәренә яҙыл­ған «Уҡытыусыма» йырын тыңлап, аҙаҡ ҡушылып йырлап тамамланыҡ. Әлбиттә, башҡорт теленә дәрестәр әҙ бирелһә лә, уҡыу­сылар урыҫса күберәк аралашһа ла, бындай саралар бала күңеленә орлоҡ һалмайынса ҡалмаҫ. Беләләр бит олуғ остазыбыҙ китаптарын!

Туймазы районы, Ҡарамалы-Ғөбәй мәктәбе.