Мәктәп сәхнәһендә – «Йөрәк һүҙе»

Кисә ҡотлау һүҙенән башланып китте, ә аҙаҡ инде «Йөрәк һүҙе» конкурсы уҡыу­сылар тарафынан әҙерләнгән концерт номерҙары менән үрелеп барҙы. Сәхнәгә бер-бер артлы мин – әсәйем менән, Сөмбөл Мостафина – улдары Фәрүәз һәм Заһит менән, Ләйсән Медаева – ҡыҙҙары Дилбәр, Динә һәм Дилә менән, Зөмәрә Кинйәкәева – ҡыҙы Йәмилә менән, Зәлиә Ҡарасурина – ҡыҙы Нурзилә, ике улы Хәниф һәм Сәлим менән, Рәүилә Кинйәкәева ҡыҙы Наҙгөл менән сыҡты. «Әсә һәм бала» сығыштары бер кемде лә битараф ҡалдырмағандыр. Әсәйҙәрҙең шиғри юлдарында балаларына булған изге теләктәре, өгөт-нәсихәттәре еткерелһә, ә инде балаларҙың һүҙҙәрендә ҡәҙерлеләренә бул­ған ихтирам, рәхмәт һүҙҙәре сағылды. Еңеүсе һәм әүҙем ҡатнашыусы ғаиләләргә мәктәп етәкселеге исеменән иҫтәлекле бүләктәр, Маҡтау ҡағыҙҙары тапшырылды.

Был бай йөкмәткеле һәм фәһемле кисәнән барыбыҙ ҙа илһам алып, күтәренке күңел менән таралыштыҡ.