Беҙҙең өсөн бик ҡыҙыҡлы экскурсия үткәрҙе. Һәр экспонат тарих һөйләй, һәр стенд күпме мәғлүмәт туплаған. «Әсәһе Бибиөммөгөлсөм үлгәндә, ул бәләкәй бала ғына була. Атаһы Камалетдин – ауылдың муллаһы. Тәүге һабаҡтарҙы атаһынан ала. Унан инде Мәнәүезтамаҡ, Әнәс ауылдарындағы, Стәрлебаштағы мәҙрәсәләрҙә уҡый, шағир Шәмсетдин Зәки дәрестәрен тыңлай. Күп сәйәхәт тә итә. Ярты ғүмере Ырымбур, Троицк, Ҡазан, Ҡостанай, Петропавловск ҡалаларында, Төркмәнстан, Ҡаҙағстан далаларында үтә. Күп яҙыусылар һәм шағирҙар, мәғрифәтселәр менән осраша, аҡын, сәсәндәр менән ҙур майҙандарҙа бәйге тота. Ҡайҙа ғына булһа ла, уҡытыусылыҡ эшен ташламай, балаларҙы уҡырға, яҙырға өйрәтә, халыҡты аң-белемгә әйҙәй. Мифтахетдин Аҡмулла, Салауат Юлаевтан һуң беренсе булып, үҙ халҡына, башҡорттарым, тип мөрәжәғәт итә, кешелекте аң-белемгә, дуҫлыҡҡа өндәгән. Уҡыусыларын ул рухлы итеп тәрбиәләгән», – тип һөйләне беҙгә Фәнис Фәтих улы.
Бик ҡыҙыҡлы мәғлүмәттәр менән таныштыҡ, фотоға төштөк. Аҡмулла шиғырҙарын һөйләп күрһәттек. Был көн бик күңелле лә, файҙалы ла һәм иҫтә ҡалырлыҡ та булды.