Бөтә яңылыҡтар

Сабата шәп атлата

Теләк булһа, үҙ ҡулдарың менән бөтә нәмәне лә эшләргә мөмкин, ти мәктәбебеҙҙең II синыф уҡыу­сыһы Гөлзиә Усманова. Ысынлап та, ҡулынан килмәгән эше юҡ тырыш ҡыҙҙың. Уҡытыу­сыһы Миңнур Мөхәмәт­йән ҡыҙы ла уны маҡтап ҡына тора, бар эште еренә еткереп баш­ҡара, ти. Беләһегеҙме, Гөлзиә сабата үрергә өйрәнгән икән.

Теләк булһа, үҙ ҡулдарың менән бөтә нәмәне лә эшләргә мөмкин, ти мәктәбебеҙҙең II синыф уҡыу­сыһы Гөлзиә Усманова. Ысынлап та, ҡулынан килмәгән эше юҡ тырыш ҡыҙҙың. Уҡытыу­сыһы Миңнур Мөхәмәт­йән ҡыҙы ла уны маҡтап ҡына тора, бар эште еренә еткереп баш­ҡара, ти. Беләһегеҙме, Гөлзиә сабата үрергә өйрәнгән икән.

Башта хеҙмәт дәресендә әсәйҙәр менән бергәләп һалабаштан, линолеумдан үреп ҡарайҙар, әммә килеп сыҡмай. Гөлзиә тағы нисегерәк эшләү ысулдары бар икән, тип ҡайтып интернеттан эҙләй. Оҫталыҡ дәрестәрен ҡарап, гәзиттән үреп булғанлы­ғы­на төшөнә. Китапханасы апай­ҙан кәрәкмәгән ҡа­ғыҙҙар һорап алып ҡайта ла ата-әсәһе менән өсәүләп эшкә тотоналар.
– Бының өсөн ПВА елеме, стержень, ҡайсы ғына кәрәк буласаҡ. Иҫке гәзитте ҡырҡып, 30 төрөпкә төрәбеҙ. Береһенә икенсеһен ялғап йәбештерәбеҙ. Бер яғында – 2, икенсе яғында 3 итеп беркетәбеҙ. Әҙер булғас, гуашь менән теләгән төҫкә буяп ҡуйырға ғына ҡала, – тип сер­ҙәрен асты ул.
Уңыштары менән илһам­ланып, үҙ бизнесы хаҡында ла уйлана башлаған Гөлзиә. Бер пар сабата Өфөлә 2 мең 500 торһа, ул 500 һум­ға ҡуймаҡсы. 10 са­бата һатып 5 мең килем алырға мөмкин. Әйткәндәй, быйыл йәй еләк-емештең мул сағын фай­ҙаланып, ата-әсәһе менән бергә һатыу итеп өлгөргән дә икән. Ысын эшҡыуар сыҡмаҫ, ти­мә, хатта тәнәфес ваҡытын­да ла сабата үреү менән мәш­ғүл. Яңыраҡ фәнни-эҙләнеү эштәре конкурсында ла сабата үреү буйынса эшен яҡлап, яҡшы һөҙөмтә күрһәтеп ҡайтҡан. Хатта Мәскәүгә «Лучше всех» тапшырыуына ла барасаҡмын, тигән был уңған ҡыҙға ни тип әйтәһең инде. Һоҡланырға ғына ҡала.

Айгөл СӨЛӘЙМӘНОВА, йәш хәбәрсе.

Бөрйән районы, Әбделмәмбәт мәктәбе.