Бөтә яңылыҡтар

Сәләмәтлек көнөн – дистанцион рәүештә

Беҙҙең гимназия уҡыусылары ла, бөтә ил балалары кеүек, ситтән тороп уҡыуға күсте. Дүшәмбенән башлап балалар, ата-әсәләр менән аралашыу, дәрестәр аңлатыу, өй эштәрен тикшереү дистанцион рәүештә төрлө алымдар менән алып барыла.

Балалар өйҙә генә ултырып уҡыһа ла, улар менән төрлө саралар уҙғарырға тырышабыҙ. Мәҫәлән, 7 апрелдә Бөтә донъя сәләмәтлек көнөн билдәләп үттек. Иртән балаларға һаулыҡ, сәләмәт тормош, спорт тураһында шиғырҙар таратып бирелде. Аҙаҡ һәр береһе яттан һөйләп, видеоға яҙҙырып, йөкмәткеһе буйынса һүрәт яһап, фотоға төшөрөп, уҡытыусыға «Бәйләнештә» йәки ватсап аша ебәрергә тейеш ине. Был ижади эш балаларға бик оҡшаны. Киске сәғәт 5-кә барлыҡ 16 уҡыусымдан да матур, сағыу һүрәттәр, йөкмәткеле видеояҙмалар килде. Ә инде бер көн иртән дәрестәр башланғансы «Сәләмәт тәндә – сәләмәт рух» тигән видеояҙмаларҙан флешмоб балаларҙың да, ата-әсәләрҙең дә күңеленә ятты. Һаулыҡ тураһында һүрәттәр галереяһы ла шәп килеп сыҡты.


Розалиә ЙӘЛИЛОВА, башланғыс синыфтар уҡытыусыһы.

Ауырғазы районы, Талбазы башҡорт гимназияһы.
Читайте нас в