Беҙҙең Мәҫкәү мәктәбенән өсөнсөнө тамамлаусы Алтынай Ситдиҡова Гөлнара Хәлфетдинованың «Батырҙар һәйкәле» шиғырын тасуири һөйләп, призлы урынға сыҡты. Уҡытыусыһы булараҡ, мин дә, ата-әсәһе лә был байрамға саҡырылғайныҡ.
Бүләкләү тантанаһы бик матур ойошторолғайны. Ленинград блокадаһын кисергән Бөйөк Ватан һуғышы ветераны Леонид Иванович Шумилов үҙенең күргәндәрен балаларға еткерҙе. Уға был ваҡытта ни бары дүрт йәш кенә булған. Апаһы арҡаһында иҫән ҡалғанын иҫенә төшөрөп алды.
Байрамды Зөлфиә Ғәбит ҡыҙы Шихова етәкселегендәге «Пионер» телестудияһы концерт номерҙары менән биҙәне. «Изгелек бүләк ит!» ойошмаһы ярҙамы менән килгән һаулыҡ мөмкинлектәре сикләнгән балаларҙың йырлағанын тыңлап, бейегәнен ҡарап һоҡландыҡ. Еңеүселәр йәнә бер тапҡыр шиғырҙарын һөйләп, беҙҙе таң ҡалдырҙы. Бигерәк тә Элина Яҡупова, Риана Вәлиева, Милена Әғлиеваның сығыштары оҡшаны. Юҡҡа ғына яңыраҡ Баймаҡ халыҡ ижады үҙәгендә уҙған «PRОявись» Урал аръяғы конкурсында Гран-при яуламағандар шул!
Һуғыш темаһына арналған кисә бай йөкмәткеле булды. Бындай осрашыуҙар йышыраҡ үтһен ине.
Беҙ ҡалабыҙҙың «Тиҫтер» үҫмерҙәр клубында уҙған бер саранан да ситтә ҡалмаҫҡа тырышабыҙ. Призлы урындар алып ҡыуанабыҙ, эшебеҙҙе, һәләтебеҙҙе күрһәтергә өйрәнәбеҙ, тәжрибә туплайбыҙ. Клуб етәксеһе Люциә Рафаил ҡыҙы Рауиловаға, уның ярҙамсыһы Гүзәлиә Эдуард ҡыҙы Сафиуллинаға мең рәхмәтлебеҙ, эштәрендә уңыштар теләйбеҙ.
Зилдә МӘҮЛИТОВА,
хеҙмәт ветераны.
Учалы районы,
Ташҡыя ауылы.