Иҫтәлекле осрашыуҙар

Ҙур байрамға әйләнде кисәбеҙ. Фазылйән Айса улы бөтә ғүмерен балаларға бағышланы, математиканан уҡытты. Үҙен оҫта етәксе итеп тә танытты. Әлеге әллә ҡайҙан балҡып ултырған мәктәп тә уның хәстәрлеге, тырышлығы менән һалынды. Бының өсөн бөтә Әбеш биләмәһе ата-әсәләренең, уҡыусыларының рәхмәте сикһеҙ.
Фазылйән Айса улына яңыраҡ 80 йәш тулды. Ветераныбыҙҙы юбилейы менән ҡотланыҡ, иҫтәлекле бүләк тапшырҙыҡ.
– Мине мәктәпкә саҡырып, ҙурлағанығыҙ, матур байрам үткәргәнегеҙ өсөн рәхмәт, – тип ҡыуанды ул.
Беҙҙе тағы ла ҡыҙыҡлы осрашыу көткән икән. Өфөнән мәртәбәле ҡунаҡтар килеп төштө. Билдәле шағирҙар, драматургтар, республика журналдары баш мөхәррирҙәре һәм студенттарҙан торған «Замандаш» театраль-фольклор төркөмө мәктәп уҡыусылары, уҡытыусылары менән осрашты.
Улар белем усағыбыҙ менән танышҡас, үҙҙәренең беҙҙең яҡҡа фольклор йыйырға, йолаларыбыҙҙы өйрәнергә килеүҙәре тураһында һөйләне, шиғри күстәнәстәре менән уртаҡлашты. Ҡунаҡтар балаларға бик күп китаптар, журналдар ҙа бүләк итте.
Осрашыу мәктәп уҡыусыларының сығыштары менән үрелеп барҙы. Ул бөтәбеҙгә лә оҡшаны. Был иҫтәлекле көн күңелдәребеҙҙә оҙаҡ һаҡланыр әле.

Алһыу АҠЪЮЛОВА,
тәрбиә эштәре буйынса директор урынбаҫары.
Хәйбулла районы, Әбеш мәктәбе.