Ҡыҙҙар-йондоҙҙар

Гүзәл әкиәттәр уйлап сығарырға ла оҫта. Былтыр уның «Батыр әтәс» тигән китабы ла сыҡҡан. «Һаумы, һаумы, әкиәт!» конкурсында үҙе яҙған әкиәтен һөйләп, баш ҡалабыҙҙың Киров районы мәктәптәре ара­һында II урын алған. Хай­уандарҙы бик ярата. Үҙҙәренең өйөндә ике алйырҙан йәшәй. Уларҙы күҙәтеүе бигерәк ҡыҙыҡ. Шундай хәрәкәтсәндәр. Үҫкәс, ветеринар булырға ла теләге бар Гүзәлдең. Ял көндәрендә Сипайлово биҫтәһенә әбейенә ҡунаҡҡа кил­гәндә күршеләге инәйҙең бесәй­ҙәрен күреп, ҡыуанысының сиге булманы. Тик икенсе бар­ғанда хужалары уны кемгәлер биреп ебәргәндәрен белгәс, бер һүрәт төшөрөп ҡуй­ған. Аҫтына «Күрше бесәйе Вася» тип яҙған. Өйҙәренә килгән кешеләрҙең үҙҙәренә һиҙҙермәйенсә генә портреттарын эшләй ҙә аҙаҡ уларға бүләк итә. Шуға ла Гүзәлгә киләсәктә ветеринар һөнәренә түгел, ә рәссамлыҡҡа уҡыр­ға кәңәш итер инек. Буш ваҡыттарында шулай һүрәт төшөрөргә әүәҫ.
Дәүләкән районының Ҡа­ҙырғол ауылында йәшәү­се Рәйфә өләсәһенең ике һы­йы­ры бер юлы быҙаула­ған, тигәнде ишеткәс, тиҙе­рәк улар­ҙы ҡайтып күргеһе килә. Исемдәрен дә үҙе ҡуш­ҡан: Сәскә һәм Аҡ маңлай. Ә 23 фев­раль көндө байрам бүләге булып, тағы бер һыйыр быҙаулаған. Уныһына Гүзәл Байрам тип исем ататҡан. Кил­һә, килә бит бәрәкәт, тағы таналары ла быҙаулаған. Буран көндө тыуғанға уға Буранбай тип исем биргәндәр. Өләсәһенең өйҙәренә ауылдағы бөтә бесәйҙәр ҙә тиерлек килеп, йәшәргә мөйөш тап­ҡан. Гүзәл шуларҙы ла күҙәтергә ярата. Тиҙерәк яҙғы каникулдың етеүен көтә. Ауылда уны һағынған дуҫтары ла күп.
Фатимаға килгәндә, бәләкәй генә бул­һа ла, шул тиклем үҙ аллы ҡыҙ. Кесе туғаны Зәйнәпте ҡараша. Тегергә, бешеренергә ярата. Бигерәк тә пицца һәм круассандары тәмле килеп сыға. Әсәһе, Башҡорт­остандың халыҡ артисткаһы Алһыу Бәхтиева, эштә саҡта уның менән бергә тышта уйнай, сана шыуа.
Фатима үҙе лә торғаны бер артистка инде. Мәжит Ғафури исемендәге Башҡорт дәүләт академия драма театрының бер нисә спектаклендә балалар ролендә сығыш яһай. Бигерәк тә Николай Краше­нинниковтың «Әмилә»һендә Әмиләне башҡарыуын тамашасылар яратып ҡараны. Яҙыу­сы Талха Ғиниәтуллиндың «Шәмсура һәм Шәмсетдин» әҫәрендә төп геройҙың ҡыҙы Ғәлиә булып уйнаны. Башҡортостандың халыҡ шағиры Рәми Ғариповтың көндәлектәре буйынса ҡуйыл­ған «Февраль. Буран» тамашаһында әҙиптең ҡыҙы Гөлнара ролен килештереп баш­ҡарҙы.
Уңған, оҫта ҡыҙҙарҙың һынлы сәнғәт студияһында шөғөлләнеп төшөргән һүрәттәрен «Йәншишмә»гә лә бирергә булдыҡ. III «Г» синыфының уҡыу алдынғылары киләсәктә уңыштары менән тағы ла ҡыуанды­рыр­ әле.

М. АЗАМАТОВ.
Өфө ҡалаһы.