Йыйынтыҡҡа VI – X синыф уҡыусыларынан 42 авторҙың ижад емештәре ингән. Унда йәш авторҙарҙың шиғырҙары ғына түгел, әкиәт, хикәйә, ҡобайырҙары ла урын алған. Хатта фэнтези жанрында ла үҙҙәрен һынап ҡараусылар бар. Ижади эштәр тематикаһы буйынса ете бүлектә бирелгән һәм ҡайһы бер авторҙарҙың 6 – 7 яҙмаһы бирелгән. «Тәбиғәттең һәр миҙгеле гүзәл» бүлегендә – төрлө миҙгелдәрҙе сағылдырыусы шиғырҙар, «Бер кем дә онотолмаған, бер ни ҙә онотолмаған» тигәнендә иһә илебеҙ батырҙарын данлаған әҫәрҙәр баҫылған. Урыҫ телендә ижад итеүселәргә лә бында «Рус түгелмен, русса яҙам» тигән айырым бүлек ҡаралған. Китап йәш ижадсыларға матур теләктәр менән тамамлана.
«Йылғалар инештән баш ала» йыйынтығының исем туйы Баймаҡ моделле балалар китапханаһында уҙҙы. Унда китаптың баш һүҙен яҙыусы, Башҡортостан һәм Рәсәй Яҙыусылар, Журналистар берлектәре ағзаһы, Юлай Мәҡсүтов исемендәге премия лауреаты Айгөл Ишемғужина-Иҙелбаева, яҡташ яҙыусыбыҙ, 13 китап авторы, Башҡортостандың атҡаҙанған уҡытыусыһы Рәйсә Миҙхәт ҡыҙы Иҫәнбаева, лицейыбыҙ директоры Булат Фәрит улы Тайбугин, тәрбиә эштәре буйынса директор урынбаҫары Гөлшат Зәйнулла ҡыҙы Иҫәнбаева, ата-әсәләр, йыйынтыҡта әҫәрҙәре урын алған уҡыусылар, Баймаҡ телевидениеһы, «Һаҡмар» район гәзите хәбәрселәре саҡырылды. Күркәм сараны балалар модель китапханаһы хеҙмәткәре Гөлназ Әкрәм ҡыҙы Сабирова бик матур итеп алып барҙы.
Бер генә ҡатнашыусы ла иғтибарҙан ситтә тороп ҡалманы. Ата-әсәләр исеменән Гөлсинә Тәлғәт ҡыҙы Зәйнуллина уҡыусыларҙы ҡотлап, йыйынтыҡ авторына рәхмәт һүҙҙәрен еткерҙе. I синыф уҡыусыһы Әмилә Мырҙағәлина ҡобайыр яҙыусыларҙы хуплап, думбырала көйләп ҡобайыр йырлап ишеттерҙе. Лицей директоры Булат Фәрит улы әүҙем ижад итеүселәргә Маҡтау ҡағыҙҙары тапшырҙы, саҡырылған ҡунаҡтар күңелдәренә хуш килгән әҫәр авторҙарына махсус приздар таратты.
Беҙҙә һәләтле ҡәләм тибрәтеүселәр күп. Уларҙың ижад инеше киләсәктә тәрән һәм бай йөкмәткеле, бейек ярлы йылғаға әйләнһен!
Әҙилә МЫРҘАҒӘЛИНА, VIII синыф уҡыусыһы.
Баймаҡ ҡалаһы, 4-се лицей.