Рәсүл Табынғолов – Ғафури районы Красноусол башҡорт интернат-гимназияһының VIII синыфынан. Конкурста «Зәйнәб Биишева – яратҡан яҙыусым» темаһына мәҡәлә яҙған. Башҡорт теле һәм әҙәбиәте уҡытыусыһы Эльвера Сәхиулла ҡыҙы Ҡунафина менән әҙибәнең ижадын төрлө яҡлап өйрәнгән. Йомғаҡлау сараһына килеүенә бик шат ине ул. «Халыҡ яҙыусыһының һеңлеһе Ләлә Биишева, Ғиниәт Ҡунафин, Айгиз Баймөхәмәтов, Сәрүәр Суриналарҙың сығыштарын йотлоғоп тыңланым. II дәрәжәле Дипломға лайыҡ булғаныма ла бик шатландым», – тине Рәсүл.
Ейәнсура районы Иҫәнғол башҡорт интернат-гимназия-һының IX синыфынан Айгизә Иҫәнсурина бәйгегә «Зәйнәб Биишеваның йырлы поэзияһы» тигән теманы һайлаған. Уның эше юғары баһаланды: ҡыҙ I урын алды. «Конференция артабан да конкурстарҙа ҡатнашыу өсөн көс һәм дәрт өҫтәне. Был сараны ойоштороусыларға ҙур рәхмәт», – ти ул.
Стәрлетамаҡтағы 23-сө мәктәптең VIII синыф уҡыусыһы Нәргизә Аҫылбаева: «Минең иң яратҡан яҙыусым – Зәйнәб Биишева. Конференция уҙғарыласағын ишетеү менән ныҡлы әҙерләнә башланым. Халыҡ яҙыусыһы тураһында күпте белеп ҡалдым», – тип тәьҫораттары менән бүлеште.
Шулай итеп, «Биишева уҡыуҙары» ғилми-ғәмәли конференцияһы уҡыусылар өсөн яңы мөмкинлектәр асты, уларҙың күңелдәрендә иҫтәлектәргә бай хис-тойғолар ҡалдырҙы. Бындай конкурстар балаларҙа башҡорт теленә һәм әҙәбиәтенә, әҙиптәренә ҡарата һөйөү, ихтирам уятыуы менән әһәмиәтле.
Лилиә ӘБЕЛҒАТИНА, II курс студенты.
Өфө фән һәм технологиялар университетының Стәрлетамаҡ филиалы.