Матбуғат йортонда ҡунаҡта

Тәүҙә «Йәншишмә» гәзите редакция­һына индек. Баш мөхәррир Мирсәйет Ғүмәр улы Юнысов баҫманың тарихы менән таныштырҙы, ә яуаплы сәркәтип Юлдаш Хәйҙәр улы Әхтәмов компьютерҙа гәзиттең нисек эшләнеүен күр­һәтте. «Аманат» журналы хеҙмәткәрҙәре менән дә күрештек, ҡыҙыҡһындырған һорауҙарға яуап алдыҡ.
Иң ҡыҙығы типографияға сәйәхәт бул­ғандыр. Машиналар геүләп, буяу еҫтәре аңҡып торған был бинала гәзит-журналдар һәм китаптар ҙур-ҙур ҡағыҙҙарға сығарыла һәм ҡырҡыла.
Уҡыусылар яңы мәғлүмәттәр алып, матур тәьҫораттар менән таралышты. Ә беҙҙе, уҡытыусыларҙы, бер мәсьәлә борсой. Милли баҫмаларҙы өйгә яҙҙырыу мөмкинлеге барыһында ла юҡ, ә сығып ҡына киоскынан алып булмай. Сөнки «Өфө-матбуғат» һатыу нөктәләре бик аҙ. Мәҫәлән, беҙ йәшәгән биҫтәлә улар юҡ кимәлен­дә. Шул проблеманы хәл итеп булмаймы икән?

Лилиә Фазлетдинова, уҡытыусы.
Өфө ҡалаһы, 108-се мәктәп.