– Яҙманы ҡыҫҡа метражлы фильмдар конкурсына “Ғаилә” көньяҡ-көнсығыш район-ара үҙәгендә төшөрҙөк. Тәүҙә ниндәй фильмды алыу тураһында оҙаҡ уйландым. Иң яратҡан хәрби фильмдарымдың береһе – “А зори здесь тихие” киноһына туҡталдым. Видеороликты Йәнтеш һәм Атингән ауылдарында төшөрҙөк. Беренсе тапҡыр өсөн бик уңышлы килеп сыҡты. Күптәр хупланы. Бынан тыш, видеоға төшөрөү, аҙаҡтан монтажлау буйынса тәүге тәжрибәм булды, – тине Хәйбулла районы буйынса балалар һәм үҫмерҙәр өсөн социаль приют мөдире Ләйсән Рәхмәтова.
Видеороликта ролдәрҙе өҫтәмә белем биреү педагогы И. Манишев, социаль приют мөдире Л. Рәхмәтова, белгес-реабилитолог Д. Хәсәнова, тәрбиәсе Ю. Величко, ғаилә менән эшләү буйынса белгес Л. Дәүләтшина, кесе тәрбиәсе Ф. Сәмикаева уйнаны.
Мәрйәм ИМАНҒОЛОВА.