Йәш армеецтар артты!

Һамар, Өфө, Подольск, Сиҙәм, Яңы Ергән, Оло Әбеш, Бүребай, Аҡъяр ауылдарынан 107 уҡыусы йәш армеецтар сафына баҫты. Тәүҙә килгән ҡунаҡтар – район хакимиәте башлығының социаль мәсьәләләр буйынса урынбаҫары Роза Рәсембәтова, Хәйбулла районы ДОСААФ-ының урындағы бүлексәһе рәйесе Фаил Юлдашбаев, һауа-десант ғәскәрҙәре ветераны Ризван Ҡорбанов, йәш армеецтар хәрәкәте етәксеһе Таһир Ишемғолов һәм махсус хәрби операцияла ҡатнашыусылар сығыш яһаны. Улар аҡыллы, спорт һөйөүсе, үҙ иленең тарихын белеүсе һәм ҙур Рәсәйҙе яратыусы балаларҙың күберәк булыуын теләне. Ә уҡыусылар Тыуған илебеҙҙең лайыҡлы граждандары булырға, йәш армеец тигән юғары исемде намыҫ һәм ғорурлыҡ менән йөрөтөргә ант итте.
Аҡъяр ауылының 3-сө мәктәбенән йәш армеецтар отряды командиры Гөлдәр Ғөбәйҙуллина иһә миҙал менән бүләкләнде.

Гөлназ ИБРАҺИМОВА.
Хәйбулла районы.