Иҫтәлеккә - сәсмәүер

Бына әле яңыраҡ Милли кейем көнө айҡанлы аҙналыҡ иғлан ителгәйне. Унда һәр синыф әүҙем ҡатнашты. Милли кейемгә арнал­ған әңгәмә, күргәҙмә, конкурс, флешмобтар ойошторолдо.
Аҙналыҡтың бер көнөндә беҙ, ҡыҙҙар, башҡорт теле һәм әҙәбиәте уҡытыусыһы Рәмилә Абдулла ҡыҙы Сәлихова менән тарих-тыуған яҡты өйрәнеү музейына барҙыҡ. Килеребеҙҙе алдан белеп, ихлас ҡаршы алдылар. Музей хеҙмәткәрҙәре беҙҙең өсөн оҫталыҡ дәресе лә үткәрҙе. Улар менән бергәләп сәс биҙәүесе – сәсмәү эшләргә өйрәндек.
Бик матур ғына килеп сыҡты. Сәсмәүҙәр үҙебеҙгә иҫтәлек итеп бирелде. Был матур биҙәүесте сәстәребеҙгә тағып йөрөрбөҙ. Апай­ҙарға рәхмәт әйтеп, ҡыуанып ҡайтып киттек.

Элина ФАЯЗОВА, VI cиныф уҡыусыһы.
Ағиҙел ҡалаһы, башҡорт гимназияһы.