Уға ҡарап һоҡланмау мөмкин түгел

– Әмир, һин ни өсөн тикшеренеү эштәренә тотонорға булдың? – тип ҡыҙыҡһынам унан.
– Атайым Нәзир Нәсим улы – махсус хәрби операцияла. Күп кенә атайҙар, улдар һәм ағайҙар Тыуған илебеҙҙе яҡлай. Уларҙың яҡындары, балалары минең кеүек үк төрлө хистәр кисерә: ғорурлыҡ та, борсолоу ҙа, ҡурҡыу ҙа... Мин бының беҙҙең, мәктәп уҡыусыларының, донъяға ҡарашына нисек тәьҫир итеүе менән ҡыҙыҡһындым. Шуға ла үҙемдең проектымда маҡсат итеп атайымдың МХО-ла ҡатнашыуы минең күңел торошома һәм шәхси үҫешемә нисек йоғонто яһағанын асырға тырыштым.
– Һинеңсә, бала кеше атаһының яуҙа булыуын тыныс итеп ҡабул итергә өйрәнә аламы?
– Уҡытыусыларға, синыфташтарға һәм дөйөм мөхиткә бәйле был. Мин үҙем, әлбиттә, атайымдың МХО-ла ҡатнашыуын Тыуған илгә файҙалы хеҙмәт һәм патриотик ҡарар тип һанайым. Уның наградаларының ни өсөн бирелгәнен аңларға тырышам. Атайым «Махсус хәрби операцияла ҡатнашыусы» һәм «Төньяҡ Кавказ биләмәһендә контртеррористик операция­лар­ҙа ҡатнашҡаны өсөн» миҙалдары менән бүләкләнде. Мин уның менән ғорурланам.
– Яугир улына хас түҙемлелек һиндә лә сағыла. Әмир, һин атайҙарының илде һаҡ­лар­ға ҡарар итеүен ауыр кисергән тиҫтерҙәреңә ни әйтер инең?
– Минең атайым, баш­ҡа атайҙар кеүек үк, ябай кеше, әммә кәрәк саҡта ул илде яҡларға күтәрелде. Уның ҡарары миндә ҙур ихтирам уятты. Тыуған илгә һөйөүҙе һүҙ менән түгел, эш менән күр­һәтергә кәрәк.
Үҙ-үҙеңә бикләнергә ярамай. Дуҫтарға той­ғоларыбыҙҙы һөйләргә, ышаныслы кешеләр, фекер­ҙәштәр менән бергә булырға, шулай уҡ ирекмәнлек эше менән шөғөлләнергә мөмкин.
– Әмир, һиңә ғилми эштәреңдә, уҡыуыңда уңыштар теләйбеҙ. Атайың иҫән-һау ҡайтһын!

Зилә ҒӘЛЛӘМОВА.