Гүзәл апай - кескәйҙәр янында

150-се балалар баҡсаһында ҡунаҡтарҙы бик йылы ҡаршы алдылар. Гүзәл апай үҙенең балалар өсөн ижады тупланған китаптарын килтергән. Кескәйҙәр иһә үҙҙәренең һәләтен күрһәтте: йырланы, сәхнә әҫәре ҡуйҙы. Ә 269-сы балалар баҡсаһында Гүзәл Ситдиҡованан педагогтар өсөн башҡорт телен өйрәтеү буйынса оҫталыҡ дәресе үтте.

102-се балалар баҡсаһында ла туған телебеҙҙең бар байлығын күрһәтергә тырыштылар: йыр, шиғырҙар яңғыраны, бейеү ҙә булды. Шағирә апайға һорауҙар бирергә теләүселәр ҙә күп кенә ине. Бына нимә тине Гүзәл апай үҙе һуңынан:

– Балаларҙың күңелле йырҙары, ихлас, нәфис итеп бейеүҙәре һөйөндөрҙө. Динар Ахуновтың әкиәт һөйләүе, Самир Дәүләтшиндең "Урал батыр" эпосынан өҙөк ятлауы хайран итте. Бәләкәй генә балаларҙа шул тиклем оҫталыҡ! Уйнай-уйнай бергәләп шиғырҙарымды ҡабатланыҡ, шунда уҡ бер нисәһен ятлап та алдылар. Коллективта үҙ эштәренең оҫталары, ҙур яуаплылыҡ тойоп хеҙмәт итеүселәр тупланғанлығы күренеп тора.Күңел байрамы кисереп, ҡыуанып ҡайттым был осрашыуҙан!