Раҡия инәйҙәрҙең йорто Урал тауы итәгендә ултырған Байымдың иң осонда, башҡа өйҙәрҙән айырымыраҡ урынлашҡан. Ауыл ситендәге ҡайын урманына инә биреберәк тора. Уларҙың ихатаһында, ялан һарайҙарында ла киҫелмәй ҡалған унлаған дәү ҡайын башын күккә сөйгән. Шуның өсөн дә, күрәһең, ҡуян, төлкө һымаҡ Урал урманы кейектәре уларҙың кәртә-ҡураһына, хатта ишек алдына ла төндәрен (ҡайһы саҡта көндөҙҙәрен дә) килеп инеп сығырға тартынмайҙыр. Ҡуяндар, билдәле, бесән һарайы тирәһендә уранғылай. Ә йыртҡыс төлкө, әлбиттә, ҡош-ҡорт маҙарҙы һағалай. Көнө-төнө йоҡлауҙан бушанмаған бәйҙәге ҡарт Муйнаҡты бар тип тә белмәй улар. Вәт, замана йәнлектәре!
Инәйебеҙ яҙ һайын егерме биш-утыҙлаған ҡаҙ бәпкәһен алып, улар үҫеп еткәнсе көҙгә тиклем шулар менән булаша. Тик, Раҡия инәй үҙе әйтмешләй, инкубатор инкубатор инде ул. Аҙ ғына күҙ яҙҙырыуың була, бер нисә өлөшкә бүленешеп, тырым-тырағай таралышырға әҙер генә торалар. Көҙгә табан ғына инде үҫеп етеп килгән бәпкәләр араһында берәй лидеры табылып, башҡа иптәштәрен йыйып, эйәртеп йөрөй башлай. Әммә йәй буйына «тәрбиәләү» өсөн уларға барыбер оло ҡаҙҙар кәрәк шул...
Шулай үткән йыл инәйебеҙ башҡаса инкубаторҙан бәпкә алмаҫҡа ҡарар итте. Көҙөн ҡаҙҙарҙың икәүһен иткә һуйҙырмай, яҙғылыҡҡа ҡалдырҙы. Береһе – аталыҡ, ә икенсеһе, кәүҙәгә бер аҙ ҡайтышырағы – инә ҡаҙ. Тик, ғәжәпкә, инәйебеҙҙең һарайында ҡышлап сыҡҡан был икәү тәүҙәрәк тә, яҙға оторо ла бер-береһенә ҡарата битараф ине. Яҙ еткәс, Раҡия инәй күпме генә көтмәһен, ҡаҙҙары йомортҡа һалманы, сөнки уларҙың икеһе лә аталыҡ булып сыҡты. Бына һиңә – мә! Инде байтаҡ ҡына олоғайған инәйебеҙ хаталанған икән…
Шул арҡала ул тағы ла Баймаҡтағы эшҡыуар Байрамғоловтың инкубаторынан бәпкәләр алып ҡайтырға мәжбүр булды. Ихатала торған ҙур ситлек эсенә ебетелгән икмәк, табаға һыу һалып, бәләкәстәрҙе шунда урынлаштырҙы. Сөнки оло ике ата ҡаҙ уларҙы ситһенеп, суҡып имгәтеүе ихтимал.
Ихатаға бәләкәстәр килеп инеү менән, ысынлап та, оло ҡаҙҙарҙың тыныслығы юғалды. Улар, муйындарын аҡҡошҡа оҡшата биреп дуғаландырып бөгөп, сәйер генә «ғо-ғо-ғо» тигән тауыштар сығарып, ситлек тирәләй әйләнешә башланы. Үҙҙәренә һалған емде лә ашамайынса, бер-икене генә суҡып алалар ҙа, кемделер һыйларға саҡырғандай, ян-яғына ҡаранып ҡаңғылдашалар.
Көндәрҙән бер көндө Раҡия инәй, бәләкәстәр өсөн бик хәүефле булыуға ҡарамаҫтан, бәпкәләрҙе аталыҡтар янына сығарҙы. Берәй нәмә була ҡалһа, тип ҡулына тал сыбығын әҙерләп тотоп торған инәйебеҙ бот сабып хайран ҡалды. Инде һигеҙенсе тиҫтәһен тултырһа ла, кескенә бәпкәләрҙе ике ата ҡаҙ бындай йылы ҡабул иткән хәлде бығаса һис бер ҡасан күргәне юҡ ине. Етмәһә, улар үҙҙәренеке лә түгел бит әле. Ситлек эсенән тайыш-тойош баҫып, берәм-һәрәм сығып килгән бәпкәләрҙе күреү менән ата ҡаҙҙар ҡысҡырышып-ҡаңғылдашып ҡанат ҡағып алды, унан инде, «ғо-ғо-ғо» тип мөмкин тиклем йомшағыраҡ өндәшергә тырышҡандай, бәпкәләр тирәһендә унда-бында йөрөй башланы. Үҙҙәренең баянан бирле ашамай һаҡлаған емдәренә әйҙәй кеүек инеләр. Тегеләре лә, һис ни булмағандай, оло ҡаҙҙарға эйәрҙе лә китте. Аталыҡтар табалағы емде бер-икене суҡыған булалар ҙа һарыҡайҙар килеп бәләкәй, йомшаҡ суҡыштары менән ашағандарын кинәнешеп ҡарап тора. Хатта бик ирмәк итеп ергә бер аҙ сүгә биреп, хас та кеше һымаҡ бейешеп тә алалар. Ул ғына ла түгел, һауытҡа ем өҫтәргә яҡынлашҡан Раҡия инәйгә ыҫылдашып ҡаршы килә башланылар, етмәһә… Хәҙер бәпкәләр тирәһенә ем урлашырға тауыҡтар ҙа килә алмай. Әллә ҡасан уҡ ошо тирәлә осоп әйләнгеләгән ала ҡарғаны бер нисә мәртәбә ҡурҡытып ҡыуып ебәрҙеләр. Яҙғы ҡояш болот артына йәшеренгәс, бер аҙ һалҡынайып, ямғыр күҙе төшә башлау менән, бәпкәләрҙе ҡуйындарына алып, йылы ҡауырһындар араһына йәшерҙеләр…
Шулай итеп, был ике ата ҡаҙ кескәйҙәрҙе йәй буйына үҙ бәпкәләрендәй итеп ҡарап, һаҡлап алып йөрөнө. Һәр көндө Таулы йылғаһы буйына алып барып йөрөп тә киләләр. Көҙгә тиклем егерме биш бәпкәнең барыһы ла иҫән генә йөрөп, инде ололарға тиңләшеп үҫеп тә етте. Ноябрь айы башланыуға йәш ҡаҙҙар ҙурлығы буйынса ололарҙан айырғыһыҙ ине инде. Тик был ике аталыҡ ҡына уларҙы һаман да бала итеп күрә, ахырыһы. Яндарына яҡынлашҡан сит кеше йә эт-маҙарҙы шундуҡ ҡыуып ебәрәләр, һаман да булһа бәпкәләрен яҡлашалар ине.
...Бер мәл инәйебеҙ иртәнсәк тороп сығыуға ҡаҙҙарҙың береһе юҡлығы асыҡланды. Барлап иҫәпләгәндән һуң, йәш ҡаҙҙарҙың барыһы ла иҫән, ә бер аталыҡ юҡ икән. Ерҙәге ҡан эҙҙәренә һәм туҙған мамыҡтарға ҡарап, ниндәйҙер бер кейек уны алып киткәнгә оҡшаған. Төлкө булдымы ул, әллә башҡа йәнлекме, бәпкәләрен яҡлашып, «дошманға күкрәге менән» ҡаршы тороп, үҙе һәләк булғандыр, тип фаразланы инәйебеҙ. «Ә-ә-әй, меҫкенкәй, – тип уны йәлләп уфтанды Раҡия инәй, – күп кенә кешеләргә лә үрнәк булырлыҡ аталыҡ ине…»
Хәлил ҺӨЙӨНДӨКОВ.