Һай, үҙебеҙҙең ҡыҙҙар!

Регина "World Beauty" матурлыҡ конкурсында Гран-при яулап, "Йәш ғаләм һылыуҡайы" (Юная Мисс Вселенная) исеменә һәм Пьер Кардендың алтын миҙалына лайыҡ булһа, Азалиә Хөсәйенова "Рәсәй һылыуҡайҙары" халыҡ-ара матурлыҡ фестивалендә "Иң йәш Рәсәй һылыуҡайы" номинацияһында I урын алды. 

Регина - Мостай Кәрим исемендәге 158-се башҡорт гимназияһы уҡыусыһы, бәләкәйҙән Фәйзи Ғәскәров исемендәге бейеү ансамбле ҡарамағындағы хореография бүлегендә шөғөлләнә. Бер йыл эсендә 11 матурлыҡ бәйгеһендә еңеүҙәр яулауға өлгәшкән, бынан тыш, мода, музыка буйынса ла уңыштары бихисап.

Ә Азалиә 48-се башҡорт лицейында белем ала. "Тамыр" балалар һәм үҫмерҙәр телеканалының "Тау-тау хәбәр" тапшырыуында эшләп тә өлгөрә, халыҡ бейеүҙәре, вокал, моделинг менән дә шөғөлләнә."Башҡортостан гүзәле- 2021", "Матурҡай - 2022" бәйгеләрендә еңеүҙәр яулаған. 2022 йылдан "Һомай" театр-дефиле студияһында хореография һәм дефиле буйынса педагог вазифаһын башҡара.

Башҡорт һылыуҙарын ҙур еңеүҙәре менән ҡотлайбыҙ! Башҡортостаныбыҙ данын һәр саҡ шулай лайыҡлы яҡларға яҙһын!

Фото: bashinform.ru