"Ҙур тәнәфес" яңы мөмкинлектәр аса

Башҡортостандан 10 уҡыусы саҡырылғайны. Уларҙың өсәүһе еңеүсе исеменә лайыҡ булды: Өфө­ләге 93-сө физика-мате­ма­тика лицейынан Кирилл Рыба­ков, Стәрлетамаҡтағы 2-се гимназиянан Ярослава Селивёрстова һәм Учалы районының Ҡунаҡбай мәктәбенән Ләйсән Сибәғәтуллина.
Уларға конкурста ҡатнашыу бик оҡшаған, киләһе йылда ла «Ҙур тә­нәфес»тә ҡатнашырға теләктәре ҙур. Ә сентябрҙә махсус поезда Санкт-Петербургтан – Влади­востокка, Владивостоктан Санкт-Петербургҡа тиклем сәйәхәт итәсәктәр.
Әйткәндәй, быйыл V – VII синыфтар араһында илебеҙ буйынса 300 уҡыусы еңеүсе булған, шулар­ҙың 88-е конкурста икенсегә ҡатнашҡан. «Ҙур тәнәфес» – Рәсәйҙә балалар өсөн иң ҙур ярыш. Ул «Мәғариф» милли проекты буйынса тормошҡа ашырыла.
«Ҙур тәнәфес»тә ҡатнашыусылар тәүҙә дистанцион этаптарҙа ҡатнаша, һынауҙар үтә. Был юлы ла 1 миллион 500 мең уҡыусы араһынан 760-ын һайлап, он­лайн-әңгәмәләшеү үткәргәндән һуң, 600 еңеүсегә «Артек»ка юллама тапшыр­ғандар. Ә унда инде ко­мандаларға бүленеп ярышалар. VII синыф­ҡа барасаҡ Учалы ҡыҙы Ләйсән Сибәғәтуллина ла «Артек»­тан ҡанатланып ҡайтҡан.
– Мин бик шәп командаға эләктем һәм уңыш йылмайҙы. Киләһе йылда ла мотлаҡ ҡатнашасаҡмын, – ти ҡыҙ.
Командала ярышыуы ҡатмарлы ғына: ундағы уҡыусылар һинең дәғүәселәрең дә бит. Логик фекер­ләү, киң белемле, асыҡ күңелле, аралашыусан булыу – бында бик кәрәкле сифаттар.
– Ләйсән – ҡыҙыҡһыныусан, маҡсатҡа ынтылыусан уҡыусы. Синыф һәм мәктәп тормошонда әүҙем ҡатнаша. Тарих, йәмғиәтте өйрәнеү, әҙәбиәт фәндәренә һәләтле. Үткән уҡыу йылында йәм­ғиәтте өйрәнеү буйынса Юрий Гагарин исемендәге кубокка үткәрелгән олимпиадала мәктәп буйынса еңеүсе булды, районда приз­лы урын алды. Әҙәби әҫәрҙе экранлаштырыу буйынса «Минең яратҡан әкиәтем» тигән район конкурсында еңде. Ләйсән тырышып белем ала, кешеләр менән ара­лашыр­ға ярата, – ти уның синыф етәксеһе Әлиә Закирова.
«Ҙур тәнәфес» конкурсында уҡыу буйынса алған билдәләр түгел, ә үҙенсәлекле фекерләй белеү мөһим. Был проектта үҙеңә оҡшаған йүнәлеште һайлай алаһың: журналистика, спорт, ижад, экология, ирекмәнлек һәм башҡалар.
Үҙегеҙ үҙгәрергә һәм донъяны үҙгәртергә теләйһегеҙме? Улайһа, «Ҙур тәнәфес» конкурсында ҡатнашығыҙ, дуҫтар. Проектҡа – https://bolshayaperemena.on­line/ V синыфтан ҡушылырға мөмкин.

Эльвира ӘСӘҘУЛЛИНА.