Беренселәр гел беренсе булһын!

Балаларҙың һәм йәштәрҙең буш ваҡытын дөрөҫ итеп ойоштороу, уларға төрлө яҡлап үҫергә һәм үҙбилдәләнештәрен табыр­ға, идеяларын тормошҡа ашырырға ярҙам итеү, һөнәр һайлау­ҙа йүнәлеш биреү өсөн кәрәк ул. Башҡортостанда ла «Беренселәр хәрәкәте»нең төбәк бүлексәһе эшләй. Ул «Йәш армеецтар», «Рәсәй йәштәр берлеге», «Башҡорт­остан пионерҙары», «Хәүефһеҙлек мәктәбе», «Ҙур тәнәфес», «Йәш журналистар лигаһы», «Вымпел» хәрби-патриотик үҙәге, «Рәсәй студент отрядтары» һәм башҡа ойошмаларҙы берләштерә. Бөтә Рәсәй балалар һәм йәштәр хәрәкәтенә 6 йәштән ҡушылырға мөмкин. 18 йәшкә тиклемге колледж уҡыусылары ла инә ала.
Әлеге ваҡытта илебеҙҙең белем усаҡтарында Бөтә Рәсәй балалар һәм йәштәр хәрәкәтенең беренсел ойошмалары асыла. Өфөләге Мостай Кәрим исемендәге 158-се башҡорт гимназияһы ла тәүгеләрҙән булып «Беренселәр хәрәкәте»нә ҡушылды. Ошо айҡанлы уҙған тантанаға «Йәш армеецтар» Бөтә Рәсәй хәрби-патриотик хәрәкәтенең республика бүлексәһе етәксеһе урынбаҫары Олег Сафронов, Өфө ҡалаһы буйынса Юл хәрәкәте хәүефһеҙлеге дәүләт инс­пекцияһы идаралығы инспекторы Татьяна Ермоленко, Дәүләт Йыйылышы – Ҡоролтай ҡарамағындағы Йәштәр йәмәғәт палатаһы ағзаһы Глеб Пахомов һәм башҡа ҡунаҡтар саҡырылғайны. Улар уҡыусыларға теләктәрен, тәҡдимдәрен, кәңәштәрен еткерҙе. Сарала гимназияла эшләп килгән «Гимназистар ҡоролтайы» уҡыу­сылар үҙидаралығы, «Прометей» ирекмәндәр ойошмаһы, «Йәш юл хәрәкәте инспекторҙары» отряды, «Кендектәр» КВН ко­мандаһы, «Диңгеҙ кадеттары» берекмәһе ағзалары ҡатнашты. Гимназияға «Беренселәр хәрәкәте»нең беренсел ойошмаһы танытмаһы тапшырылды.
– «Беренселәр хәрәкәте»нә ҡушылыу һеҙгә үҙегеҙ кеүек яңы таныштар табырға, ҡыҙыҡлы конкурстарҙа, слёттарҙа, фестивалдәрҙә ҡатнашырға мөмкинлек бирәсәк. Изге сәғәттә! – тине Татьяна Ермоленко гимназис­тар­ҙы ҡотлап. Эйе, был хәрәкәт балаларҙың һәләттәрен асырға, идеяларын тормошҡа ашырырға ярҙам итер, тигән ышаныста ҡалып, уларға уңыштар теләйбеҙ. Беренселәр гел беренсе булһын!

Э. РӘШИТОВА.