Боронғо башҡорт уйындарын да уйнанылар

Уның әйтеүенсә, уларҙың күбеһе боронғо йолаларҙан барлыҡҡа килгән. Ә был уйындарҙы фестивалдә беренсе тапҡыр өйрәнгән балалар үҙҙәренең милли үҙенсәлеген тоя ала. - Һәр традицион йәки хәҙерге заман мәҙәниәтендә, уйын - ул балаға донъяны танытыуҙа иң беренсе аҙым. Иң тәүге уйындар баланы хәрәкәт итергә һәм хәрәкәттәрҙе координациялауға өйрәтә. Артабан, дүрт-биш йәштән, балалар иғтибарҙы талап иткән, ҡатмарлыраҡ уйындарға күсә. 4-5 йәштән ҡыҙҙар - биш таш, ә малайҙар – ашыҡ, таяҡтар һәм таштар менән уйнай, - ти Гөлкәй Шаһапова.
Үҫмер саҡта балалар физик яҡтан әүҙем уйындар уйнай башлай. Ә бына хужалыҡ алып барыу күнекмәләрен «ҡыҙ-әсә» («ҡунаҡ саҡырышыу», «өй уйыны») уйынында, ҡурсаҡтар, уларға кейемдәр тегеүҙә күрергә мөмкин. Шулай итеп, уйындар ярҙамында балалар аралашыу, хеҙмәт күнекмәләренә өйрәнә.
- Икенсе төрлө әйткәндә, бала социализациялана, әхлаҡи нормаларҙы үҙләштерә һәм йәмғиәттә үҙ урынын биләй. Уйын аша белем алыу бөтә этностың һаҡланып ҡалыуын, яраҡлашыуын һәм үҫешен аңлата, - тип һығымта яһай Гөлкәй Шаһапова.
Өфөлә «Әйҙә уйнарға» фестивалендә балалар асфальтта таш, бау, бүре һәм хатта һарыҡ һөйәктәре менән мауығып уйнай. Ҡаланың бер генә балалар майҙансығында ла бындай күренеште осратмаҫһың. Ә бит борон был уйындарҙы һәр бала белгән, уйнаған.