Ташҡабағың күп булһа, күршеңә бир!

Тимәк, ташҡабаҡ күплеге беҙҙең илдә йәшәүселәрҙе генә борсомай. Яҙын ултыртабыҙ ҙа, Аллаға шөкөр, йәйенә ҡутарылып уңа, ә күп ашап булмай. Күршеләрегеҙ ҙә һеҙҙең изгелегегеҙҙән туйып бөткән икән, әйҙәгеҙ, иң еңел рецепт буйынса уны ҡыҙҙырып ҡарайыҡ.

Йәшелсәбеҙҙе таҙартып, йоҡа кенә дүңгәләктәргә турап, орлоғон алабыҙ. Кляр, йәғни бутҡа эшләйбеҙ: йомортҡа, он, тоҙ, һөттө бергә болғатабыҙ. Тәмләткестәр ҡушыу – үҙегеҙҙең ҡарамаҡта. Хәҙер инде дүңгәләктәрҙе ошо бутҡаға манып, үҫемлек майында ҡыҙҙырырға ҡала. Йәш ташҡабаҡ, әлбиттә, тиҙерәк бешәсәк. Икенсе рецепт: уны ҡырғыстан үткәреп, һыуын һарҡытып, он, тоҙ, йомортҡа ҡушып, кәтлит кеүек әүәләп ҡыҙҙырырға була. Йәш хужабикәләр, Ташҡабаҡ көнөндә ошо ябай ғына ашамлыҡтар ғаилә ағзаларығыҙҙың күңеленә мотлаҡ хуш килер.

Лилиә МӘҮЛИТОВА.