"Ҡашҡаҙан" паркында - Милли кейем байрамы

Өфөләге «Ҡашҡаҙан» мәҙәниәт һәм ял паркында республика халыҡтарының традицион кейемдәренә арналған сағыу программа тәҡдим ителә. 15.00 сәғәттә балалар һәм өлкәндәр өсөн сәйләндән, кейеҙҙән, күндән, керамиканан, ҡағыҙҙан һәм башҡа материалдарҙан кейем-һалым һәм биҙәүестәр эшләү буйынса оҫталыҡ дәрестәре башлана.

Әбйәлил районынан тарихи костюм һәм йорт йыһаздарын һаҡлаусылар ҡатын-ҡыҙ түшелдеректәре экспозицияһын тәҡдим итәсәк, боронғо башҡорт күлдәген нисек дөрөҫ кейергә өйрәтәсәк. Фонтан алдындағы майҙанда 15:00 сәғәттә төрлө халыҡ бейеүе буйынса оҫталыҡ дәрестәре буласаҡ.

Тарихи костюм, шулай уҡ Өфө дизайнерҙарының һәм «Ағиҙел» предприятиеһының заманса коллекциялары күрһәтеләсәк. Байрамдың махсус ҡунаҡтары - «Евразия ауазы» Бөтә Рәсәй музыкаль проекты еңеүселәре Наталья Дзыга (Удмуртия), «Саль» төркөмө (Карелия), Марат Татурас (Башҡортостан) һәм «Сокол» казак төркөмө (Мәскәү). (12+)

Фото: ufacity.