Иң ҙур орган ниндәй?

Мейелә компьютерҙан да күберәк мәғлүмәт һаҡлана ала.
Баш мейеһе – донъялағы иң ҡеүәтле «компьютер». Ул миллионлаған факттарҙы һаҡлай. Мейе шул тиклем ҙур хәтер күләменә эйә – триллион гигабайтҡа тиң мәғлүмәтте һыйҙыра ала! Был бөтә интернет селтәрендәге мәғлүмәттән дә күберәк.

Һөйәктәребеҙ ҡоростан нығыраҡ.
Ысынлап та, әгәр уларҙың ауырлығын һәм ныҡлығын сағыштырһаҡ, кеше һөйәге ҡоростан нығыраҡ. Шул уҡ ваҡытта ул бер нисә тапҡырға еңелерәк! Ә тәндәге иң ҡаты һөйәк — бер нисә тонна баҫымға сыҙаған янбаш һөйәге.

Йөрәк көнөнә 100 мең тап­ҡыр тибә.
Йөрәк – тәндең иң ғәжәп ағзаларының береһе. Ул өҙлөкһөҙ эшләй, бөтә организм буйлап ҡан һурҙыра. Бер көн эсендә йөрәк 7 мең 500 литрҙан ашыу ҡан ҡыуа. Был ике тулы бассейнға торошло!

Баш мейеһе электр энергияһы булдыра.
Был электр импульстары нервылар аша сигналдар тапшырырға һәм һәр аҙымыбыҙҙы, фекеребеҙҙе, хәрәкәтебеҙҙе контролдә тоторға ярҙам итә. Нимәлер уйлаһаң да, эшләһәң дә, һинең мейең тән буйлап миллионлаған ваҡ электр сигналы ебәрә. Ҡыҙыҡ: мейе бәләкәй генә лампочканы тоҡандырырлыҡ энергия етештерә. Был башыбыҙҙағы бәләкәй электр станцияһы кеүек!

Кеше тәненең 60 проценты һыуҙан тора.
Ябай ғына шыйыҡса организмыбыҙҙың эше өсөн бик кәрәкле. Тән ауырлығының яртыһынан күберәген һыу тәшкил итә, ул төрлө ағзаларҙың, күҙәнәктәрҙең һәм хатта ҡандың эшен көйләй. Тимәк, организмыбыҙ яҡшы эшләһен өсөн көн һайын етерлек шыйыҡса эсергә кәрәк. Ә беләһегеҙме, мейенең 75 проценты һыуҙан тора! Шуға күрә һыу эскән һайын тәнеңде генә түгел, мейеңде лә туҡландыраһың.

Күҙҙәр көнөнә 20 мең тапҡыр йомола.
Организмдағы иң әүҙем ағзаларҙың береһе бул­ған күҙҙәр минутына 15 – 20 тапҡыр йомола икән. Был уларҙы таҙарта, дымландыра, туҙандан һәм микробтар­ҙан һаҡлай. Беләһегеҙме, көнө буйына күҙ йомолмаһа, улар бик ҡоро булыр ине.

Тире – тәндең иң ҙур ағзаһы.
Беҙ уға тәнебеҙҙе һаҡлаусы тип кенә ҡарайбыҙ. Ысынында тире кешеләге иң ҙур орган иҫәпләнә. Әгәр ҙә беҙ оло кешенең тиреһен йәйеп һала алһаҡ, уның майҙаны 2 квадрат метр самаһы тәшкил итер ине. Әйткәндәй, тире даими яңыра. Кеше бер йылда 4 килограмм тире күҙәнәктәрен ташлай. Был бәләкәй генә тоҡсайға һыймалы икән!

Тел һәм бармаҡ эҙҙәре һәр кемдә уникаль.
Төрлө кешелә бер үк, ҡабатланған бармаҡ эҙҙәре юҡ. Тел менән дә шулай икән! Әгәр беҙ бармаҡ эҙҙәре урынына тел эҙен ҡуллан­һаҡ, һәр кем еңел генә таныла алыр ине.