Йырға ла һәйкәл бар

* 1843 йылда Чехияның Дачице шәкәр заводы управляющийы Яков Кристоф рафинад шәкәрен уйлап таба. Әлеге көндә элекке шәкәр заводы урынына рафинад шәкәренә һәйкәл ҡуйылған.
* Санкт-Петербургта Гоголь повесындағы танау, батыр һалдат Швейк, ғәйепһеҙгә үлтерелгән эт Му­му, изге кеше Гаврош һәйкәлдәре бар. Тамбовта – бү­регә, Ижев­ски­ҙа – билмәнгә, Мыш­кинда – быймаға, Томскиҙа бәхеткә һәйкәл ҡойолған.
* Угра йылғаһының текә ярында донъяла йырға ҡуйылған берҙән-бер һәйкәл ҡал­ҡып тора. Шағир Михаил Исаковский «Катюша» йырының һүҙҙәрен Смоленск өлкәһенең Глотовка ауылында яҙа башлап, Всходы ауылында тамамлап ҡуя. Угра районы халҡы йырға һәйкәл ҡуйып, уны мәңгеләштерергә ҡарар итә.
* Флоренция эргәһендәге Борго-Сан-Ло­ренцо ҡалаһында «Көтөп тороу­сы эткә» тип аталған һәйкәл бар. Ул ун дүрт йыл буйы хужаһын көткән Фидо ҡушаматлы эткә ҡуйылған.
* Бөйөк Британияла күгәрсенгә бронзанан һәйкәл ҡуйыл­ған. Ул 1942 йылдың яҙында һыу аҫты кәмәһенән хәбәр алып килгәне өсөн иң юғары хәрби бүләккә лайыҡ була.
* 1961 йылда Рос­товта йәшәгән Витя Черевичкин исемле малайға Бөйөк Ватан һуғышы осорондағы батырлығын һынландыр­ған бронза һәйкәл ҡуйыла. Ул күгәрсендәр үрсеткән. Гитлерсылар ҡош­тар­ҙы юҡ итергә әмер биргәс, Витя ҡанатлы дуҫтарын иреккә сығарып ебәрә. Был ҡылығы өсөн малай үлтерелә.
* 1986 йылдың 4 июлендә Нью-Йоркта урынлаштырыл­ған Азатлыҡ статуяһы Уралдан килтерелгән металдан ҡойолған.
* 1993 йылдың 12 ию­нендә Баш­ҡортостандың Баймаҡ районы Төркмән ауылы янындағы Туғажман тауы башына ҡурайға һәйкәл ҡуйыла. 15 метр бейеклектәге, 19 тажлы һәйкәлдең авторы – Миҙхәт Байрамғолов.
* Рәсәй Геройы Миңлеғәле Шайморатовтың Өфөләге һәйкәле Европалағы, Мәскәүҙәге, Петербургтағы ябай ат статуяларынан ҙурыраҡ.
* Өфөнөң Октябрь проспектындағы «Мир» сауҙа һәм күңел асыу үҙәге алдында урам һепереүсегә һәйкәл ҡуйылған.

Факил МЫРҘАҠАЕВ.