Бирешмәм!

– Аҡйегет, һин ниндәйерәк бала булып үҫтең?
– Иҫ киткес тыныс, тип әйтер инем. Сәңгелдәктә сәғәттәр буйы иламай ята алғанмын. Хатта әсәйем, бер-бер хәл булдымы икән тип, тын алышымды тикшереп-тикшереп торған.
– Мәктәптә нисек уҡының?
– VIII синыфҡа тиклем отличник булдым, һуңынан ялҡаулыҡ еңде. География, алгебра, физик тәрбиә дәрестәре оҡшай ине. Байназар мәктәбен тамамлағас, ювелир һөнәре буйынса колледжға уҡырға индем. Әммә, әрмегә саҡырылыу сәбәпле, уны тамамламаным.
– Сәхнәләге тәүге аҙымдарың тураһында һөйләп үт әле.
– 11 – 12 йәштәрҙә үҙ аллы брейк-данс менән шөғөлләнә башланым һәм беренсе сығыштарым ошо “урам бейеүе” менән бәйле. Ә йыр менән сәхнәгә саҡ ҡына һуңыраҡ күтәрелдем. Алтынай ағайым этәргес булды, ул күп нәмәгә өйрәтте.
– Ижадыңа байҡау яһап киткәндә, ниндәй йырҙарҙы йәштәр яратып тыңлай, тип әйтә алаһың?
– «Байрам» йыры сыҡҡас, мине күп ерҙә таный башланылар. Әле репертуарымда 20-ләп ижад емешем бар. «Осам», «Мыжыма», «Ай кеүек күҙҙәрең», «Нисек түҙергә?», «Бирешмәм», Башҡорт хужабикәһе менән бергә яҙҙыр­ған «Сәләм бөтәгеҙгә лә!» йырҙарын яҡшы беләләр.
– «Бирешмәм» йырының ҡыҙғаныс тарихы ла бар бит әле...
– Эйе. Дүрт йыл элек, икеләтә сальто эшләргә өйрәнгән саҡта, нисектер яҙа һикерҙем – үҙем дә бер ни аңламай ҡалдым. Ярты ай реанимацияла, бер ай кара­уатта хәрәкәтһеҙ ятыу, тағы бер ай инвалид коляскаһында ултырыу... Табиптар, аяҡ­ҡа баҫыуың иллегә илле, тине. Сөнки арҡа мейеһе етди йәрәхәтләнгәйне. Минең әле атлап йөрөүем мөғжизәгә тиң.
– Бөгөн нимә менән шөғөлләнәһең?
– Төп эшем сәхнә инде. Дуҫ егеттәр менән тәүҙә Бөрйән буйлап концерттар бирә инем, һуңынан йырсы Гүзәл Уразованың командаһы менән бөтә Рәсәйҙе урап сыҡтым. Әле район-ҡалаларыбыҙҙа әүҙем сығыш яһайым. Тамашасыларым блогымды ла яратып күҙәтә.
– Ниндәй хыялдар менән янаһың?
– Ижади яҡтан үҫешергә, билдәлелек яулар­ға теләйем. Йәнә һаулығымды нығытырға кәрәк. Юғиһә, йәрәхәт алғандан һуң физик мөмкинлектәрем сикләнде, хатта йүгерә лә алмайым. Ә сәләмәтлегең юҡ икән, алда күп ишектәр ябыҡ.
– Һорауҙарға ихлас яуап биргәнең өсөн рәхмәт, Аҡйегет! Уңыштар һиңә!

Лилиә МӘҮЛИТОВА әңгәмәләште.