+27 °С
Облачно
Гәзитебеҙ - дуҫыбыҙ
29 Мая 2021, 05:40
Йәйге каникулды ла - "Йәншишмә" менән!
Баймаҡтан ҡыуаныслы хәбәр килде. Ҡалалағы 4-се лицейҙың VI «В» синыфынан ун бер уҡыусы «Йәншишмә»гә яҙылған. Был хаҡта уҡытыусылары Гөлгөнә Исмәғил ҡыҙы Яҡшыбаева еткерҙе.
– Беҙҙең синыфта әүҙем, тәртипле һәм берҙәм уҡыусылар йыйылған. Нурислам Сараев менән Наилә Сәлихова һүрәт төшөрөргә әүәҫ. Наилә «Минең әкиәт геройым» район һүрәттәр конкурсында еңеүсе булһа, Нурислам – ҡул эштәре буйынса район бәйгеләрендә призёр. Алтынбай Хәсәнов Баймаҡ тураһында видеоэкскурсия төшөрөп, Маҡтау ҡағыҙы алып ҡыуанды. Шулай уҡ Кәрим Хәкимовҡа арналған республика интернет-викторинаһында һәм «Иғтибар, йылмаябыҙ!» район фотоконкурсында – Илзирә Ғәлиуллина, Әхмәтзәки Вәлидигә арналған олимпиадала һәм КРИТ конкурсында Сәләмәтлек йылына арнап төшөргән видеояҙмаһы менән Айгиз Оморҙаҡов та районда призлы урын яуланы. Ә Камилла Саникина лицейҙа үткәрелгән «Яҙ һылыуы» бәйгеһендә еңеп сыҡты. Спортты яратҡан Динар Мәүлекәев ушу-саньда буйынса беренселекте бер кемгә лә бирмәй.
Синыфта оҫта ҡурайсыларыбыҙ ҙа бар. Улар – Рифат Йәндәүләтов, Нурислам Сараев һәм Алтынбай Хәсәнов. Яңыраҡ Маҡтау ҡағыҙы менән бүләкләнделәр. Камилла Ибраһимова менән Гөлназ Дәүләтбаева белем усағының – иң әүҙем уҡыусылары. Өҫтәүенә, бик матур бейейҙәр. Лицейҙағы бер сара ла уларһыҙ үтмәй. Ә Айгүзәл Иҫәндәүләтова йырлап ебәрһә, бар тирә-яҡ моңға күмелә, бөтәһе лә хайран ҡала.
Быйылғы уҡыу йылын бына ошондай уңыштар менән тамамланыҡ. Улай ғына түгел, йәй буйы яратҡан гәзитебеҙҙән айырылмаҫ өсөн тағы ла «Йәншишмә»гә яҙылып, бүләк тә оторға хыялланабыҙ, – ти Гөлгөнә Исмәғил ҡыҙы.
Зөһрә ХӘКИМОВА.
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
