Үҙҙәре бар яҡтан да өлгөлөләр бит әле. Бөтәһе лә тик «дүртле» һәм «бишле» билдәләренә өлгәшә. Бишәүһе лә бейеү түңәрәгенә йөрөй. Төрлө конкурстарҙа әүҙем ҡатнашып, мәктәп данын күтәрәләр.
Нурзиә МЫРҘАБУЛАТОВА – уҡыу алдынғыһы, көндәлеген «бишле»ләр генә биҙәй. Ике йыл рәттән «Һаумы, һаумы, әкиәт!» конкурсында ҡатнашып, республика кимәлендә призлы урын яулаған. Тағы ла районда үткән шиғыр һөйләү бәйгеһендә лә уңышҡа өлгәшкән. Бейергә лә әүәҫ икән үҙе.
Зөмәрә СОЛТАНОВА, халҡыбыҙҙың мәшһүр мираҫы булған «Урал батыр» эпосының 600 юлын яттан һөйләү бәйгеһендә ҡатнашып, «Өмөт» номинацияһында еңгән. Шулай уҡ район буйынса мәғлүмәти технологиялар буйынса «КРИТ» конкурсында II урынға лайыҡ булған.
Эльвира МОСТАФИНА ла бик тырыш, һәләтле уҡыусы. Ул район күләмендә «Һаумы, һаумы, әкиәт!» конкурсында II урынды алған.
Әминә ЮНЫСБАЕВА менән Данил ЮЛМӨХӘМӘТОВ оҫта рәссамдар икән. Һүрәттәре матур килеп сыға. Бейеү буйынса ла һынатмайҙар, призлы урындар яулап ҡына торалар.
Бына шундай шәп, тырыш, аҡыллы, әүҙем өсөнсөләр менән таныштым.