Йомаштағы «Ағинәйҙәр» ойошмаһы Ралинаға гәзит бүләк итте

«Ағинәйҙәр» ойошмаһы етәксеһе Зифа Иҫәнова:

– Беҙ ҙә ҡулыбыҙҙан килгәнсе һалдаттарыбыҙға ярҙам итәбеҙ. Һалдаттарыбыҙға һаҡлап йөрөтөүсе бетеүҙәр, дарыуҙар һәм ризыҡтарҙан – ҡаҡланған ҡорот, ҡаҙы, көлдә бешерелгән картуф, сөсө икмәк ебәрергә тырышабыҙ. Шулай уҡ яугирҙарыбыҙға юрған, яҫтыҡ та ебәрҙек. Беҙҙең төркөмдәге ҡатын-ҡыҙҙар барыһы ла ихлас изгелек ҡыла. Уларҙың тормош иптәштәре лә ҙур ярҙам күрһәтә, – ти. 

Ауыл ағинәйҙәре, «Йәншишмә» гәзите – изгелек кәштәһе»нә ҡушылып, махсус хәрби операцияла ҡатнашыусы яугирҙың ғәзиз балаһы Ралинаға гәзит-бүләк эшләне. Бына тиҙҙән Баймаҡ ҡалаһында йәшәүсе Ралина  гәзит уҡый башлаясаҡ. Ралина Әлибәкова – Баймаҡтағы 5-се мәктәптең I cиныф уҡыусыһы. Ул гел «бишле» билдәләренә генә уҡый. Төрлө сараларҙа әүҙем ҡатнаша, матур итеп бейей ҙә. Йомаш ағинәйҙәренең гәзит-бүләген дә шатлана-шатлана, рәхмәт әйтеп алды.

Әйҙәгеҙ, дуҫтар, шулай балаларҙы ҡыуандырайыҡ! Әйткәндәй, 12 апрелгә тиклем гәзит-журналдарға арҙан хаҡҡа яҙылып була.