+13 °С
Облачно
Иҫтәлекле көндәр
29 Апреля 2021, 06:25
Тәүге профессиональ бейеүсебеҙ
29 апрелдә Халыҡ-ара бейеү көнө билдәләнә, шул уңайҙан республикабыҙҙың тәүге профессиональ бейеүсеһе тураһында иҫкә алып үтәйек әле.
РСФСР-ҙың атҡаҙанған сәнғәт эшмәкәре, Салауат Юлаев исемендәге дәүләт премияһы лауреаты Фәйзи Әҙеһәм улы Ғәсҡәров ул. 1912 йылдың 21 октябрендә тыуған, үҙенең ата-әсәһен хәтерләмәй. Бөрөлә, Смоленск өлкәһендә балалар йорттарында тәрбиәләнгән. 1920 йылдар аҙағында тыуған яғына ҡайтҡас, һабантуйҙарҙа бейеүселәр араһында уға етеүсе булмай. Һәләтле егет Мәскәүгә барып, СССР-ҙың Ҙур театры ҡарамағындағы хореография техникумына уҡырға инә. 1928—1932 йылдарҙа данлыҡлы балетмейстер Игорь Моисеев класында бейеү серҙәренә төшөнә. Уҡып бөткәс,Өфөгә ҡайтып, Башҡорт театр-сәнғәт училищеһында уҡыта, шул уҡ ваҡытта башҡорт һәм урыҫ театрҙарында балетмейстер була. Ленинград хореография училищеһының башҡорт төркөмөнә һәләтле балаларҙы туплап ебәреү менән шөғөлләнә.
Иң беренсе башҡорт бейеү коллективын булдырыусы ла ул Фәйзи Ғәскәров. 1939 йылдың 5 майында уның етәкселегендәге ансамбль тәүге тапҡыр сығыш яһай. Хатта фронтта ла бейеү коллективы төҙөй.
Хәҙер Фәйзи Ғәскәров исемендәге халыҡ бейеүҙәре ансамблен Рәсәйҙә генә түгел, хатта сит илдәрҙә лә беләләр.
2022 йылда республикабыҙҙың тәүге профессиональ бейеүсеһенең тыуыуына 110 йыл туласаҡ.
Фото: infourok.ru
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
