Һаумы,һаумы,мәктәбем!

1 сентябрь - бөтәбеҙ өсөн дә һәр ваҡыт тулҡынландырғыс мәл. Был көн өлкәндәргә бала саҡ иҫтәлектәрен яңырта, айырыуса яҡты тойғолар уята. Һәр кеше үҙ мәктәп юлын үтә, ә һуңынан балаларын, ейән-ейәнсәрҙәрен белем усағына алып килә. Һәр саҡ беренсе ҡыңғырау сыңлауын ишетеп, бөтәбеҙ ҙә сикһеҙ шатлыҡ тойғоһо кисерәбеҙ.

Уҡыусыларға, студенттарға яҡшы уҡырға, ныҡлы белем алырға, ә уҡытыусыларыбыҙға һаулыҡ, эштәрендә ижади уңыштар теләйбеҙ.

1 сентябрь

Байрам менән ҡотлап, йомарт ҡояш

Һибә ергә сағыу нурҙарын.

Мәктәп юлындағы балаларҙың

Гөлләмәләр биҙәй ҡулдарын.

Белем донъяһына атлай улар,

Ярһып тибә кескәй йөрәктәр.

Уҡытыусылар ҙа ҡаршы ала,

Теләп иң-иң изге теләктәр.

Беренселәр, ана, йүгерә-атлай

Ашығалар бүлмәләренә.

Ошо көндән улар ҙур көс һалып

Ынтылалар белем үренә.

Ун берҙәргә был көн һағышлы ла:

Алда – мәктәп менән хушлашыу.

Йәшлек хыялдары көткән юлда

Маҡсаттары менән дуҫлашыу.

Уҡыусылар өсөн яулар үрҙәр,

Ҙур һынауҙар алда көтәләр.

Белем, маҡсат, хыял үрҙәренә

Тик тырыштар ғына етәләр.

Нәркәс ҠӘЙЕПҠОЛОВА