– Әс-сәләмү ғәләйкүм, йәш дуҫтарым! 2 майҙа беҙ һеҙҙең менән динебеҙҙәге иң ҙур байрамдарҙың береһен – Ураҙа ғәйетен ҡаршылайбыҙ. Был байрам изге Рамаҙан айы тамамланыу хөрмәтенә үткәрелә. Уның дауамында беҙ ураҙа тоттоҡ. Ураҙа ваҡытында аслыҡтан интеккән кешеләрҙең хәлен аңлайбыҙ, уларға ҡарата мәрхәмәтле булабыҙ. Аллаға шөкөр, илебеҙҙә аслыҡ кеүек ҡурҡыныс күренештәр юҡ, әммә донъяла бер телем икмәккә һәм бер йотом һыуға мохтаждар бар. Шулай уҡ ураҙа иртәнән кискә тиклем ашамау-эсмәү генә түгел, ә бөтә насар эштәрҙән тыйылыу, бер-береңә ярҙам итеү. Был байрам көндө мосолмандар бер-береһен ҡотлай, бүләктәр бирешә. Һеҙ ҙә, дуҫтарым, ошо байрамда атай-әсәйҙәрегеҙҙе, туғандарығыҙҙы, күршеләрегеҙҙе һәм дуҫтарығыҙҙы ҡотларға онотмағыҙ.
Ураҙа ғәйете мөбәрәк булһын!