Борон-борон заманда ҡалын-ҡалын урмандар араһында Байһаҡал тигән ауыл булған. Бик матур урында урынлашҡан ул. Тирә-яғын бейек-бейек тауҙар уратып алған, ти. Сылтырап аҡҡан шишмәләренең һыуы шул тиклем тәмле икән. Эргәһендә көнө-төнө әллә күпме ҡоштар һайрап ҡына торған.
Бына шул ауылда ҡурҡыу белмәҫ һунарсы егет йәшәгән. Бер көндө ул үҙенең сираттағы һунарына сығып киткән. Теләге – һеләүһенде эләктереү, ти. Тик урман-тауҙарҙы күпме ҡыҙырып йөрөмәһен, был йәнлек осрамаған. Ә башҡалары уға әлегә кәрәкмәгән. Шулай йөрөй торғас, бер тау ҡыуышлығына барып сыҡҡан. Ағас ботаҡтары шытырлаған тауышҡа әйләнеп ҡараһа, егеттең алдында үтә лә сибәр ҡыҙ баҫып тора икән. Уның сәстәре һап-һары, оҙон, ә күҙҙәре зәңгәр күк йөҙөмө ни! Кейеме – ниндәйҙер йәнлек тиреһенән. Үҙе әйтеп бөтөрә алмаҫлыҡ һылыу, ти. Улар күпмелер ваҡыт бер-береһенә ҡарашып торғас, был сибәркәй егеттән ҡасмаҡсы була. Һунарсы ла юғалып ҡалмай, уны ҡыуа төшә. Һылыуҡайҙы тотоп алғас, юғалтыуҙан ҡурҡып, үҙенең уҫал ниәтле булмауын әйтеп бирә. Сабый баланы йыуатҡан кеүек, әүрәтеп кенә ҡыҙҙы ауылына алып ҡайта. Уның һылыулығына барыһы ла хайран ҡала.
Ҡыҙҙы күрергә күрше йәйләүҙәрҙән дә килгәндәр хатта. Күп кенә ир-егеттәр ғашиҡ булған, ләкин ауыҙ асып, һүҙ һөйләргә батырсылыҡ итмәгәндәр.
Һунарсы егет Һарысәсен әсәһенә алып килеп күрһәткән. Уныһы ҡыҙҙы бик оҡшатып, өйләнешергә фатиха биргән. Йәштәр Байһаҡалда йәшәй башлаған. Был ғаиләнең бер-бер артлы балалары ла донъяға килгән, ти. Шулай башҡорттар араһында зәңгәр күҙле, һары сәслеләр барлыҡҡа килгән, имеш.