Бер ваҡыт илгә бәлә килгән. Дүрт башлы аждаһа юлында осраған һәр тере затты ялмап, йотоп килә, ти. Күп егеттәр ошо яуыз менән алышып, баштарын һалған икән. Шулай ҙа дүрт батыр аждаһаны нисек еңеү юлын тапҡан, ти. Улар бик тәрән соҡор ҡаҙған да сатыр-сотор, мүк, үләндәр менән һиҙелмәҫлек итеп ҡаплап ҡуйған. Эргәһендәге дүрт ағас башына ауыр туҡмаҡтар элгәндәр. Һәр береһе тәғәйен урынға менеп, дошманды көтә башлаған.
Бына бер мәл ауыр баҫып, яңы ҡорбан эҙләп, улар яғына дүрт башлы аждаһа яҡынлаған. Әҙәм еҫе һиҙеп ҡалған яуыз ҡабаланып йүгерә башлаған, ти. Күп тә үтмәй, ул тәрән соҡорға ҡолап төшкән. Шуны ғына көтөп торған егеттәр дүрт яҡтан ауыр туҡмаҡты уның башына төшөрөп тә ебәргән. Ә Аждаһа ҡурҡыныс тауыш сығарып, үкерә, тулай икән, ти. Баштарынан ялҡын сәсеп, соҡор аша егеттәргә ынтыла башлаған. Батырҙар ҡылыстарын уңлы-һуллы һелтәп, ҡәбәхәт менән ҡаты алышҡан. Тик ҡапыл Шахназарҙың хәле бөтә башлаған. Яуыз уны тыны менән үҙенә тарта икән. Егеттең ҡылыс күтәрерлек тә көсө ҡалмаған. Ағалары ярҙамға ташланғансы, яуыз утлы ялҡыны менән уны ялмап алған, ти. Айҡаша торғас, батырҙар аждаһаның дүрт башын да өҙә сапҡан. Ҡустылары ғына башҡаса аяғына баҫа алмаған. Өс көн, өс төн туғандары уның ғүмере өсөн көрәшкән. Яуыз аждаһа ағыулы тешен ҡаҙап өлгөргән була. Шахназар ауған ерҙә тәрән күл барлыҡҡа килә.
Ағалары аждаһаны тураҡлап, өйөп яндыра. Үҙҙәре, кесе туғандарының рухын һаҡлап, өс яҡтан тауҙар булып ҡалҡҡан, ти.
Диниә КӘБИРОВА, VI синыф уҡыусыһы.
Белорет ҡалаһы, Яныбай Хамматов исемендәге башҡорт гимназияһы.