+31 °С
Ясно
Илһам
28 Мая 2021, 05:42
Өләсәйем
Мин мәктәптән ҡайтам арып,Еңел түгел уҡыуҙар.Энә менән ҡойо ҡаҙыу, Белеп әйткән ололар.
Майҙансыҡҡа барып еткәс,
Аптырап туҡтап ҡалам.
Тәмле еҫтәр килә өйҙән,
Ишекте аса һалам.
Сисенеп тә тормайынса
Аш бүлмәһенә инәм.
Өҫтәл тулы ризыҡ-ниғмәт,
Өләсәй килгән – беләм.
Бына шатлыҡ! Йүгереп шәп
Һарылам муйынына.
Үҙен һағындым бигерәк,
Иҫ китмәй тәм-томона.
– Һөйләп ебәр, ҡыҙым, – ти ул, –
Өйрәндең нимәләргә?
Уҡып йөрөү – бәхет бит ул
Ҡәҙерен белгәндәргә.
– Гел яҙып та уҡып ҡына
Ултырмайбыҙ, – тим үҙем, –
Ҡумыҙ сиртергә өйрәндем,
Уйнап күрһәтәм хәҙер!
Шундай матур көйҙө ниңә
Тиккә әрәм итергә?
Төшөп китә өләсәйем
Тыпыр-тыпыр бейергә.
Батмус эләктереп алған,
Сиртеп ебәрә серт-серт.
Ҡара инде, ике кеше
Ҡуя ала бит концерт!
– Эй, үҙемдең өләсәйем,
Һиндә күпме дәрт-һөнәр?!
Беҙҙең мәктәпкә кил әле,
Түңәрәк асып ебәр!
Резеда КИЛСЕНБАЕВА,
уҡытыусы.
Салауат ҡалаһы,
23-сө мәктәп.
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
