Борон-борон заманда йәшәгән, ти, Кәзә менән Ҡуян. Улар икеһе лә урманда көн иткән. Кәзә менән Ҡуян бик дуҫ булған, бер-береһенә ҡунаҡҡа йөрөшкән, хатта бер ағасты кимергән. Ҡуяндың мамығы ҡупшы, тик оҙон һалҡын ҡыштарҙа йылытмай икән, шуға ул йылынырға тип йүгереп тик йөрөй, ти. Ә Кәзәнең дебете ҡуйы, матур, шуға ла дуҫы кеүек сапмай, ә ағас башында ҡайыҙ кимереп ята икән.
Бына бер ваҡыт Һунарсы Кәзә янынан үтеп барғанда, уны күреп, бик шатланған, ти. «Ҡайһылай дебете матур, әбейем үҙенә берәй нәмә бәйләп алыр», – тип уйлап, һаҡалтайҙы алып ҡайтып киткән.
Шулай итеп, Кәзә ауылда йәшәй башлаған. Һунарсының әбейе уның дебетенән йылы ойоҡбаш, бейәләй бәйләгән.
Тик һәүетемсә йәшәп ятҡанда Кәзә урманда ҡалған дуҫын һағынып, бойоға башлаған. Хужаһы малы өсөн борсолоп, сәбәбен һорай икән. Кәзә хәлде аңлатып биргән. Киткән, ти, Һунарсы Ҡуянды эҙләп урманға. Уны ла табып алып ҡайтҡан. Әбейе Ҡуян мамығынан да бейәләй-шәл бәйләп ҡараған, ләкин Кәзәнекенән хөртөрәк икән. Ҡойолоп тора, мамығы ҡыҫҡа булған, ләкин бер ҡышҡа сыҙай, ти. Шунан алып «Бер ҡышҡа ҡуян тиреһе лә сыҙаған» тигән әйтем ҡалған, имеш.
Ҡуян менән Кәзә ҡарттарға эйәләшеп, бик күңелле итеп ауылда йәшәгән. Кәзәнән данлыҡлы Ейәнсура шәлдәре бәйләрлек мамыҡлы тоҡомдары таралып киткән. Әле лә бында ҡышҡы оҙон төндәрҙә апай-инәйҙәр, кәзә дебетен маҡтай-маҡтай, йылы ойоҡбаш-бейәләйҙәр, шәлдәр бәйләй. Ә ҡуян тиреһенән тун, бүрек тегәләр. Ул хәҙер ауылда йәшәгәс, йорт ҡуянына әйләнгән.
Ғайсар ҠАНСУРИН.