Йәмил Ҡотлогилдин ижады

Атай нигеҙе

Төрлөсә тартҡылаһа ла яҙмыш,
Ташлап китмәнем атай нигеҙен.
Ауыр булһа ла тормош юлдарым,
Һөйрәп атланым яҙмышым йөгөн.

Атай нигеҙен һүндермәйенсә,
Яңынан-яңы үрҙәр балҡытам.
Төпсөгөм, тиеп һөйөнөр ине,
Иҫән булһа икән дә атайғынам.

Атай нигеҙе үҫтерҙе беҙҙе
Сабый саҡтан уҡ һәр етебеҙҙе.
Тоғро ҡалып йәшәй бирәмен,
Ташламайынса изге нигеҙҙе!

Алтын һуҡмаҡтар

Көҙгө һуҡмаҡ. Һары япраҡ
Аяҡ аҫтында ҡала шығырлап.
Һары һағышҡа суммаһын күңел,
Йәшәйек әле моңланып-йырлап.

Һуҡмаҡтар тулы һары япраҡтар
Беҙҙе илтәләр ап-аҡ ҡыштарға.
Йөрәк әрнетеп ҡалмайыҡ ҡарап
Һауала осоп барған ҡоштарға...

Һары һағышҡа суммаһын күңел,
Көҙҙөң айҙары ул бары алтын.
Берҙәм булайыҡ тормош юлында,
Күңелдәребеҙ булмаһын һалҡын!

Танкистар

Алғы һыҙыҡта уттар урғыла,
Шартлай миналар, танктар бара.
Дошмандар бирмәй алға барырға,
Беҙҙең танкистар ыңғайын таба.

Янһа ла бара танкистар алға,
Тыуған ил өсөн, батһа ла ҡанға.
Һуғыш бик ауыр, дошман да көслө,
Ниңә һуң улар беҙгә ныҡ үсле?

Фашист ҡалдығын көлгә күмегеҙ,
Иҫән ҡайтығыҙ кире үҙегеҙ.
Дөмөктөрөгеҙ барлыҡ дошманды,
Тик етһен генә түҙемлегегеҙ!

Беҙҙең танкистар алғы һыҙыҡта,
Тик кемдер күрмәй оло байрамын.
Иҫкә төшөрөп тостар әйтәйек
Һәм күтәрәйек улар байрағын!

Аҙашмағыҙ, туғандар

Аҙаштыра оло юлдар,
Түҙһа ҡара туҙандар.
Ауыр икән был донъяла,
Айырылһа туғандар.

Аҙашам, тип уйламаным,
Яңғыҙ сыҡтым юлдарға.
Өмөттәрем туғандарҙа,
Аҙашһам бурандарҙа.

Туҙандарҙы, бурандарҙы
Үтеп сыҡтым, туғандар.
Тик алдағы юлдарымды
Томалаған томандар...

Томандарҙы урап уҙам,
Алда ҡара урмандар.
Мине эҙләп арттарымдан,
Аҙашмағыҙ,туғандар!

Йәмил Ҡотлогилдин ижады

Әүҙем дуҫыбыҙҙан бер шәлкем шиғыр тәҡдим итәбеҙ.