Борон-борон заманда йәшәгән, ти, береһенән-береһе матурыраҡ өс ҡыҙ – Сәлиә, Сәлимә, Сәминә. Улар көн һайын йылғаға һыуға йөрөгән.
Берҙән-бер көндө, яуыз бер малай уларҙың килеүен ҡарап торған да таш ташлап йонсота башлаған. Сәминә биҙрәһе менән һыу алам тип эйелһә, ҡабаланыуынан көйәнтәһен төшөрөп ебәргән. Апайҙары менән бергәләп эҙләп ҡарағандар, тапмағандар. Инде төн дә еткән. Көйәнтәмде тапмайынса ҡайтмайым, тип ҡыҙ бер үҙе генә тороп ҡалған. Аптырағас, тәрәнгәрәк төшөп ҡарамаҡсы булған. Шул саҡ Һыуһылыу күренмәһенме! Үҙенең ҡулында алтын, көмөш һәм ағастан эшләнгән көйәнтәләр, ти.
– Һин кем? Ниңә минең яныма килдең? – тип һорай икән ул ҡыҙҙан.
– Мин үҙемдең көйәнтәмде эҙләйем.
– Ошоларҙың ҡайһыһы һинеке? Үҙеңдекен һайлап ал. Алтынымы, әллә көмөшөмө?
– Юҡ, минеке ағастан ғына эшләнгән.
– Дөрөҫөн һөйләгәнең һәм яҡшы ҡыҙ булғаның өсөн өсөһөн дә бирәм, – тигән Һыуһылыу.
Ҡыҙ бик шатланған. Өйгә ҡайтҡас, алтын менән көмөшөн апайҙарына бүләк итеп биргән, ти.
Гүзәл НУРҒӘЛИНА.
Әбйәлил районы, Таштуй ауылы.