Кисен Гөлнара ни эшләптер өйҙә толҡа тапманы. Китап уҡып, һауыт-һаба йыуып, туҙан һөртөп, көндәлеген дә уҡып ҡараны. Юҡ, барыбер күңеленә ниҙер етмәгән кеүек. Баҡсаларына йүнәлде.
Вәт, тышта рәхәт! Ниндәй саф һауа, ҡояш та үтә ныҡ ҡыҙҙырмай. Көн кискә ауышҡан мәл. Үләндәр, ағастар, гөл-сәскәләр ҙә йоҡларға йыйынған төҫлө. Баҡсаның иң түрендә, киң ботаҡтарын йәйеп, мең йәшәр муйыл ағасы үҫә. Ҡарағат ҡыуаҡтары, бына-бына бешәбеҙ, тип торған емештәрен ҡош-ҡорттан ҡыҙғанған һымаҡ, бер-береһенә һыйыныбыраҡ ултырған. Һырғанаҡ ҡыуаҡтары хужаларын емештәре менән ҡыуандырып, маһая, имеш.
– Эй, нескә күңелле һомғолҡайҙарым, арығанһығыҙҙыр инде, күҙегеҙҙе йомһағыҙ ҙа була, – тип шыбырланы ҡыҙ, үҫтергән сәскәләренә ҡарап.
Ә бына түтәлдәрҙә ултырған кишер, шалҡан, кәбеҫтә, һуған нимәнәндер ҡурҡып, боҫоп, шыбырлашып ултырған кеүек. Ә... ҡыҙыҡай аңланы уларҙың ҡайғыһын. Юҡ, юҡ, һеҙҙе бер ниндәй ҙә шуҡ малайҙар йолҡҡослап, йәберләй алмаҫ. Бында бит Гөлнара апайығыҙ бар, тип йылмайып ҡуйҙы ул.
Әсәһенең тауыш биреүенә ҡыҙ һиҫкәнеп китте. Йәшелсә-емештәргә эстән генә тыныс йоҡо теләп, өйгә ашыҡты. Күңел болоҡһоғанда тәбиғәт менән аралашыу яҡшы тәьҫир иткәнлеген аңланы Гөлнара. Сөнки уға әле шул тиклем рәхәт, күңеле тыныс ине.
Алһыу ҠАҺАРМАНОВА.
Учалы районы, Наурыҙ мәктәбе.