Радик ХӘКИМЙӘНОВ
ЯҘҒЫ ТАҢДА
Ярһыу мәле етһә ташҡындарҙы
Мөмкинме һуң быуып тоторға?!
Еркәйемә яңы миҙгел килә
Яҙ тигән бер аҫау толпарҙа.
Йомарт ҡояш ынйыларын һибә –
Бураҙналар нурға ҡойона.
Ете диңгеҙ үтеп ҡоштар ҡайта –
Тәбиғәттең яҙғы туйына.
Офоҡ балҡый, ҡояш ергә төшә,
Елдәр тарай ағас баштарын.
Сал Уралым йәшел елән кейә.
Аҡыҡ мәллә ҡая таштары.
Бар йыһандың һабан туйы микән –
Ниндәй хозур, сихри был ваҡыт!
Миҙгел ҡошо миңә ҡағылды ла
Йөрәгемде китте ҡуҙғатып.
Уйҙарымды биләй ер яҙмышы,
Хәтер ебен бик һаҡ тағатам,
Утлы йылдар үтә күҙ алдымдан...
Ә еремдә тыныс таң ата.
Күтәрелгән ҡояшҡа мин бағам,
Киләсәгем микән сыуаҡлы?
Ә йөрәгем, ҡошҡа әүерелеп,
Төйәк итте бөҙрә ҡыуаҡты.
Зиннур БОҪҠОНОВ фотоһы.
Фото: vk.com