Бесән мәле

 Ҡылды ҡырҡҡа ярыр бесән мәле,
Терелделәр урман юлдары;
Сабынлыҡта бөгөн күп кешеләр:
Кемдең ире,кемдең улдары.

Урман юлдарынан аттар түгел,
Хәҙер трактор үтә,машина.
Трактор арбаһына ҡырын ятып,
Килдек беҙ ҙә Шүлгән Башына.

Бик күп йылдар ошо юлдан үттек
Кырандаста - атлы арбала,
Себен-серәкәйҙәр арттан ҡыуа,
Ат тиренең еҫе тарала.

Заман техникаһы хәтәр хәҙер,
Алыштырҙы атлы арбаны,
Онотторҙо күптән ҡул салғыһын,
Ағас һәнәк,ағас тырманы.

Гөрләп тора барлыҡ сабынлыҡтар,
Тормош ҡайнай ҡырҙа,яланда;
Мәтрүшкәле сәйҙәр - баҡырсала,
Тәмле аштар бешә ҡаҙанда.

Бесән, усаҡ төтөндәре еҫе
Сирләгәнгә дауа булырҙай,
Эскә һыймай ошо хозурлыҡтар -
Күҙҙән шатлыҡ йәше субырҙай.

Ҡабаланып эшләй бесәнселәр,
Кемдер йыя,кемдер күбәләй,
Көнө буйы аяҙ ғына тормай -
Болот сығып,ямғыр һибәләй.

...Тормош алға елә,элеккегә
Ҡайтмаҫ инде бер ни яңынан.
Мин - хыялый,һаман ҡул салғыһын,
Ат тиренең еҫен һағынам.
                 Флүрә Маликова.

Фото: sun9-64, dzeninfra.