-4 °С
Болотло
TelegramVKOK
Бөтә яңылыҡтар

Үҙем генә ғәйеплемен

Дүрт ай элек Динар исемле егет һөйө­үен белдерҙе. Уның һүҙҙәре мине әсир итте һәм дуҫлашырға ризалаштым. Үҙенең күҙҙәре мөхәббәт уты менән яна, ихлас ярата һымаҡ. Ә мин, һөйәм, тип алданым. Ысынында ул миңә оҡшай ғына ине, ә уға ҡарата йөрәгемдә яратыу тойғоһо булманы.

Үҙем генә ғәйеплемен
Үҙем генә ғәйеплемен

Яңы йыл байрамын дуҫтар менән бергә ҡаршы алдыҡ. Каникул мәлендә лә осрашып торҙоҡ. Мин һәр саҡ ярат­ҡан кеше һымаҡ ҡыландым. Әммә мөхәббәт ялғанды яратмай икән. Динар ҙа хистәремдең саф булмауын аңланы, ахыры. Бер ниндәй сәбәпһеҙ араны өҙҙө. Ә мин быға ҡай­ғырманым да, шатланманым да кеүек. Ни өсөн икәнен белергә генә теләнем. Ә был һорауға, көсләп астырған күҙҙәрҙең нуры булмай, тигән смс яуап ҡына алдым. Ярай улайһа, тип артыҡ иғтибар итмәҫкә тырыштым. Әммә барыһы ла мин уйлағанса ғына булһа икән ул...
Динар менән бәйләнеш өҙөлгәс, кү­ңелемде бушлыҡ ялмап алды. Кәйефем дә юҡ. Бергә үткәргән саҡтарҙы һағынып йыш иҫкә алам. Егетемде юғалт­ҡас ҡына бөтәһенә лә төшөндөм. Улай ғына ла түгел, яратам да, буғай... Тик быны һуңлап ҡына аңланым шул.
Ҡыйыулығымды йыйып, Ғашиҡтар көнөндә хистәремде еткерергә булдым. Мәктәптә матур сара үтте. Дискотека мәлендә Динар янына килһәм, ул икенсе ҡыҙҙы ҡосаҡлап тора. Быны күргәс, эй, ҡыйын булды инде. Күҙ йәштәрем атылып сыҡты. Ни эшләргә белмәйем... Дискотека бөткәнен көтөп тә тормай тышҡа йүгерҙем. Юл буйы илап ҡайттым. Яратҡан кешеңде юғалтыуы, бигерәк ҡыйын икән. Ҡулымдағы бәхетемде үҙем ысҡындырҙым шул... Үҙем генә ғәйеп­лемен.
Әллә Динар­ҙың да һөйөүе ялған булдымы икән? Тиҙ арала миңә алмаш тапмаҫ ине? Хәҙер ошо һорау борсой мине. Дуҫтар, һеҙ нисек уйлайһығыҙ? Мөхәббәтем өсөн көрәшергәме, юҡ­мы? Кәңәштәр көтәм.

ЫНЙЫ.
Мәсетле районы.

Автор:Юлиә Кирәева
Читайте нас в